Arrestohet Xhabir Zharku

Sot është arrestuar ish-kryetari e Kaçanikut, Xhabir Zharku, pasi që dyshohet se ka keqpërdorur detyrën zyrtare.

Lajmin e ka konfirmuar zyrtari i Policisë për Informim, Baki Kelani, i cili ka bërë të ditur se rasti i keqpërdorimit dyshohet se është kryer në vitit 2010 në Kaçanik.

“Sot, më 14.12.2019, Njësia për Hetimin e Krimeve Ekonomike dhe Korrupsionit e Ferizajt, ka arrestuar një të dyshuar për përfshirje në veprat penale: ‘Keqpërdorim i pozitës dhe autoritetit zyrtar” dhe ‘Ushtrim i ndikimit’”.

“Rasti dyshohet se ka ndodhur në vitin 2010 në Kaçanik. Me aktvendim të prokurorit i dyshuari është dërguar në mbajtje për 48 orë.”

Ndryshe, Xhabir Zharku në vitin 2011 u dënua me tre vjet burgim për veprën penale të detyrimit dhe armëmbajtje pa leje. Pas konfirmimit të dënimit, Zharku u largua nga Kosova duke i ikur kështu dënimit me burg. Për gati 5 vjet e gjysmë ish-kryetari i Kaçanikut dhe ish-zyrtari i PDK-së qëndroi në arrati në Suedi. Më 7 qershor të 2018, Xhabir Zharku u kthye sërish në Kosovë pasi Gjykata Themelore e Ferizajt, dega në Kaçanik, nxori vendimin për ndalim të ekzekutimit të dënimit me burg meqë lënda e tij ishte parashkruar.