Identifikohet sulmuesi i FSB në Moskë

Mediat ruse identifikuan personin që hapi zjarr mbrëmjen e së enjtes në selinë e Shërbimit Federal të Sigurisë, FSB, në Moskë si Yevgeny Manyurov, 39 vjeç, i cili ka punuar si roje e sigurisë.

Ai vrau një oficer të këtij shërbimi dhe plagosi pesë të tjerë me armë automatike, para se të vritej nga një snajperist, raporton RFE duke shtuar se një nga të plagosurit është civil.

Në Kremlin, vetëm disa kilometra larg, presidenti rus, Vladimir Putin, ka qenë duke mbajtur takim me Shërbimin Federal të Sigurisë në kohën e sulmit.

Detajet për personin e armatosur u raportuan sot nga e përditshmja qeveritare ruse, Rossiiskaya Gazeta, duke cituar burime të policisë.

Manyrov, kur ka hapur zjarr, “ka thirrur slogane tipike të (grupit militant) Shteti Islamik”, raportoi gazeta Kommersant.

Shërbimi Federal i Sigurisë është shërbimi kryesor i inteligjencës ruse.