Buxheti 2020, Ministrja Denaj: Shpërblimi për pensionistët, 3.000 lekë!

Qeveria ka vendosur sot të shpërblejë të gjithë pensionistët në vend me rastin e festave te fundvitit me 3.000 lekë.

Lajmin e ka bërë të ditur ministrja e Financave dhe Ekonomise, Anila Denaj, duke shtuar se qeveria e mbajti premtimin pavarësisht gjendjes së vështirë shkaktuar edhe për shkak të emergjencës pas tërmetit.

“Këshilli i Ministrave vendosi sot akordojë bonusin 3 mijë lekë për secilin pensionist dhe gjithë ata që trajtohen me fonde në këtë kategori,” tha ministrja.

Sipas saj, edhe pse ishte një vit jo i lehtë, duke i shtuar pasojat e tragjedisë së tërmetit, qeveria miratoi bonuesin, nga i cili do të përfitojnë pensionistët në vend, përfshirë ata me pensione invaliditeti, pensione familjarë, apo ata që marrin trajtime të veçanta financiare si ish minatorët apo ish ushtarakë në pension të parakohshëm.

Duke folur për Buxhetin 2020 ajo tha se ka për synim ruajtjen e parametrave fiskale, duke pasur një buxhet të fokusar në rindërtim dhe investime në vazhdimësi për çdo qytetar.

“Indikatorët e synuar në Buxhetin 2020 do të jenë:  Ulja e borxhit në nivelin e 64.8% të PBB-së, deficitit  prej 2.2% PBB-së, Investime Publike jo më pak se 4.55% të PBB, dhe një bilanc primar pozitiv në nivelin prej 0.1% të PBB-së”, tha Denaj.  Fokusi, sipas saj, do të jetë ofrimi i shërbimeve dhe realizimi i prioriteteve strategjike.

Në lidhje me faturën financiare të tërmetit Ministrja tha se tashmë në Buxhetin e 2020 është akorduar një fond prej 20 miliardë lekë që do të mbështsë Programin e Rindërtimit.

Ministrja Denaj u ndal edhe te projekti i fiskalizimit. “Kaluam këtë vit në Komisionin e Ekonomisë ligjin e fiskalizimit që është i rëndësishëm. Afati kohor, fillon  në 2020 me disa faza tranzicioni. Fillimi i përdorimit të këtij instrumenti nga bizneset pritet të finalizohet  në qershor 2021. Objektivi kryesor i këtij projekti është përmirësimi i informacionit i ardhur në Drejtorinë Tatimorë është qëllimi kryesor.