Më mirë për Kosovën, Haradinaj: Me dështu Kurti, mos me kriju Qeverinë!

Kryeministri në detyrë dhe kryetari i Aleancës për Ardhmërinë e Kosovës, Ramush Haradinaj, sot në Kuvendin e Punës të AAK-së, vlerësoi se më mirë për Kosovën është me dështu Albin Kurti dhe mos me kriju Qeverinë. Dhe jo vetëm kaq! Me dështu LDK, të shkohet tek PDK duke respektuar rezultatin zgjedhor dhe të krijohet qeveria pa Vetëvendosje ose të shkohet në zgjedhje.

“Koncepti që Albin Kurti po e përfaqëson në politikë është mashtrim. Ai ka shkuar në formën populiste të mbledhjes së votave, ai ka shkuar në formën e kompromitimit dhe dëmtimit të asaj që është krijuar. Ai ka shkuar në mbledhjen e një besimi duke ia bërë punën e vështirë atyre që punojnë por nuk e ka bërë asnjëherë këtë me logjikën që nesër me ndërruar gjendjen. Ai gjithë kohën ka bërë politikë me qenë kauzë vet, me mbet kauzë ai nuk e ka qëllimin t’i krijojë institucionet, pra nuk ka me krijuar qeveri Albin Kurti, ai ka me vazhdu me mbet në kauzë, me vazhdu me mbledh rreth vetës njerëz për një kauzë por nuk është përmirësimi i gjendjes në shëndetësi, arsim apo krijim të vendeve të punës. Kjo shihet shumë qartë nga qasja e tij për të krijuar institucionet, me kriju qeverinë,” tha Haradinaj, duke ia përmendur Lëvizjes Vetëvendosje vitin 2017 kur pyetnin ku janë numrat.

“Ku janë Vetëvendosje sot, a i kanë numrat, ose pse i kanë ata numra, pse i kanë kërku ato vota, çka kërkojnë të bëjnë me to. Qe gjashtë muaj ditë kam dhënë dorëheqje, vendi ish deshtë me pas qeveri, në vend ish deshtë me ndodh zhvillimi e punësimi e me ecë përpara. Çka po ndodhë në Kosovë sot, një telenovelë në mes Kurtit dhe të tjerëve që janë pengë e tij. Çka është më mirë për Kosovën, me dështu Kurti dhe mos me kriju Qeverinë. Me dështu i dyti, me shku te i treti, me respektu rezultatin zgjedhor dhe me pas qeveri pa këtë të parin apo me shku në zgjedhje,” tha Kryetari i Aleancës për Ardhmërinë e Kosovës duke hedhur akuza nga partnerët koalicionit PAN, ku, siç tha ai, ata gjatë bashkëqeverisjes kanë menduar vetëm për vete, por jo edhe për Kosovën.

“Partnerët e koalicionit qeverisës gjithmonë në fokus kanë pasur forcimin e vetës, kalimin pa pasoja të etapave edhe krijimin e partneritetit potencial në dëm për Kosovën. Këto janë të vërteta, dhe kjo është arsyeja pse në këto zgjedhje kemi shkuar ndaras, dhe nuk synojmë kthimin në PAN. Kthimi në PAN nuk është formulë për AAK-në, për shkak se përvoja në bashkëqeverisje, në kohën kur unë jam përballur në raste të caktuara me palë të ndryshme për të mbrojtur interesin e Kosovës, kolegët e mi, bashkëpunëtorët, tek të cilët është dashur të llogaris në ta, ata kanë mbrojtur vetëm interesin personal dhe partive të tyre politike. Tash së fundmi e vëreni me kritikat për shpenzimin e rezervës ose me kritikat për shpenzimin e buxhetit. Ministri i Financave që është njeri përgjegjës që ka marrë rrogë gjatë gjithë qeverisjes së financave e shihni si është fshehur, nuk del asnjëherë që të jap një shpjegim. Nuk i shpenzon kryeministri paret, paret i shpenzon ministri i financave,” tha Ramush Haradinaj duke vazhduar të jetë i bindur se AAK është ndoshta e vetmja parti në shërbim të ruajtjes, mbrojtjes dhe forcimit të Kosovës së pavarur.

“Zakonisht në etapa të ndryshme kohore, forcat politike të Kosovës të gjitha kanë ndihmuar që Kosova të ecë në rrugën e vet, drejt pavarësisë, të mbetet e pandarë, të ketë sovranitetin, integritetin territorial dhe kufijtë e me radhë. Mirëpo, ka plot momente kur forcat politike janë fokusuar vetëm për vetveten, përfshirë udhëheqësit politik,” tha Kryetari i AAK duke përfunduar:

“Ndoshta AAK është e vetmja parti në Kosovë që për më shumë kohë gjithë potencialin e vet e ka vënë në shërbim të ruajtjes, mbrojtjes dhe forcimit të Kosovës së pavarur, ashtu siç kemi rënë dakord me 17 shkurt 2008, dhe ashtu siç na kanë njohur miq e aleatë.”