Vetëvendosje dhe LDK pritet të takohen sot, LDK përveç Presidentit e do edhe Kryetarin e Parlamentit

Pas ngecjes së bisedave për koalicionin qeverisës, Lëvizja Vetëvendosje dhe LDK pritet ti rikthehen sot tryezës së bisedimeve.

Dy partitë dje janë deklaruar se janë të gatshme për të vazhduar bisedimet, siç thonë, në kërkim të zgjidhjes për formimin e qeverisë ndonëse asgjë zyrtare nuk është përcaktuar.

Nënkryetarja e LDK-së, Vjosa Osmani, mbrëmë paralajmëroi një takim mes Albin Kurtit e Isa Mustafës për sot.

“Takimet duhet të vazhdojnë, besoj qysh nesër (sot) dhe të gjendet sa më shpejt një zgjidhje në përputhje me interesat e qytetarëve dhe te vendit”, tha Osmani edhe pse çështja është acaruar pas ndarjes së një asnshme të posteve nga Albin Kurti.

Anëtar i Kryesisë dhe njeriu i afrërt me kryetarin e LDK, Arban Abrashi, mbrëmë përmes një postimi në Facebook bëri të ditur se partia e tij këmbëngulë që të marrë postet që i ka synuar qysh në fillim, kur edhe kanë nisur bisedimet me Vetëvendosje, pra presidentin dhe kryetarin e parlamentit, që tashmë VV i ka marrë me zgjedhjen e Konjufcës si dhe publikimin e 5 ministrave nga Albin Kurti.

“LDK-së sikur në fillim edhe tash duhet t’i takojnë Presidenti, Kryeparlamentari dhe pesë ministri,” thekson Abrashi.

Por VV pas zgjedhjes së Konjufcës këtë çështje e quan të kryer.

Albulena Haxhiu, e nominuar nga Kurti si ministre e Drejtësisë deklaroi dje se Konjufca nuk do të japë dorëheqje nga posti i kryetarit të Kuvendit, pavarësisht gjithçkaje.

“Çështja e kryeparlamentarit është çështje e kryer. Ai s’do të japë dorëheqje. E kemi pritur LDK-në 81 ditë dhe s’ka pasur lëvizje. Madje, për çështjen e kryeparlamentarit s’kanë shfaqur interes sa kanë shfaqur për Presidentin dhe MPB-në”, ka thënë Haxhiu.

Në këtë situatë, me deklaratën e Haxhiut dhe Abrashit, pritet se kush do të hap rrugë drejtë krijimit të qeverisë LDK, Vetëvendosje apo Hashim Thaçi. Përvoja ka treguar se në Kosovë parimet kanë rënë, madje kullën e fundit e shembi dje edhe Albin Kurti