Shpërthim i fuqishëm në Yzberisht, tre të lënduar. Policia jep detajet…

Një shpërthim i fuqishëm ka tronditur mëngjesin e sotëm Yzberishtin. Sipas policisë, shpërthimi në rrugën “3 Dëshmorët” në Yzberisht ishte shpërthim i një bombole gazi në një byrektore ku kanë mbetur të lënduar tre persona, pronarja dhe dy punonjëset.

Byrektorja është në katin e parë të një pallati ku shpërthimi ka shkaktuar dëme të shumta materiale si dhe panik ndër banorët e zonës.

Policia ka shkuar në vendngjarje ndërkohë vazhdojnë hetimet për zbardhjen e plotë të shkaqeve të ngjarjes.

Njoftimi i policisë

Rreth orës 07:25 në rrugën “3 dëshmorët” në një pikë që tregton prodhime brumi, ka shpërthyer një bombol gazi ku si pasojë është lënduar lehtë shtetasja K.S, bashkëpronarja e biznesit, si dhe dy punonjëset A. M dhe M. P.

Grupi hetimor ndodhet në vendngjarje ku po vijon punën për sqarimin e mëtejshëm të rrethanave të ngjarjes.