Pas Reformës Zgjedhore, Basha: Zgjedhjet e parakohshme Parlamentare dhe Lokale në një ditë

Pas e pranoi se tryeza e djeshme u realizua vetëm falë presionit të ndërkombëtarëve ndaj mazhorancës, Kryetari Partisë Demokratike, Lulzim Basha, sqaroi se nuk ishte thjeshtë një takim por nisja e procesit të Reformës Zgjedhore , si një kusht i Bundestagut për çeljen e negociatave. Dhe, pasi i dha përgjigje të gjitha dyshimeve lidhur me tryezën e djeshme dhe konkluzionet, pas Reformës Zgjedhore, objektiv i radhës i Opozitës së Bashkuar, tha lideri i saj, do të jenë Zgjedhjet e parakohshme Parlamentare dhe ato Lokale në një ditë.

“Jam i qartë dhe e përsëris nuk është takim, është procesi i Reformës Zgjedhore, kusht i Bundestagut për çeljen e negociatave e për zgjedhjet e lira e të ndershme. Një vit më parë gjërat dukeshin sikur shkonin fjollë, ishte beteja jonë që çoi në këtë rezolutë. Hapi i parë është reforma zgjedhore. Synimet tona janë të qarta, brenda 15 marsit Reforma Zgjedhore, dhe të detyrohet pala tjetër t’i japë fund ilegjitimitetit në vend. Kjo është axhenda jonë,” tha Lulzim Basha duke ripërsërit edhe njëherë tre kushtet e Opozitës së Bashkuar për Reformën Zgjedhore, shkëputjen e politikës nga krimi, ndëshkimin e krimit elektoral dhe marrja e vendimeve për Reformën Zgjedhore mes opozitës së bashkuar dhe mazhorancës.

“Lufta e krimit në politikë, ndëshkimi i krimit elektoral nga Dibra e kudo, janë dy kushte të Opozitës së Bashkuar. Pavarësisht, propagandës së shfrenuar të atij që për katër vite me radhë u mundua të anashkalojë kushtet e Bundestagut, faktet janë këto: Reforma Zgjedhore nuk do të diktohet nga qeveria e dalë me votat e blera dhe pseduopozita e blerë më paratë e krimit dhe oligarkisë. Vendimet për Reformën Zgjedhore do merren mes Opozitës së Bashkuar dhe Parlamentit monist+patericat e veta.”

Lideri i opozitës garantoi me këtë rast se synimi i vetëm i Opozitës së Bashkuar është të kthejë lirinë e votës për qytetarët shqiptarë.

“Garantoj qytetarët shqiptarë, demokratët mbështetësit e opozitës, të zhgënjyerit nga partia e tyre, se procesi ka një dhe vetëm një qëllim të kthejë lirinë e votës, që çdo shqiptar të vendosë për qeverinë që do, parlamentin që do, e ti shkarkojë ato me votë, siç ndodh kudo në rajon. Kjo betejë nuk bëhet as për karriget tona, as fatet tona politike. Sakrifica e mandateve të djegura, solli atë që çdo kush mund ta konsideronte të pamundur, vetëndërgjegjësimin e Perëndimit, se Shqipëria ka nevojë për ndihmë.

Mos kini asnjë dyshim, është vetëm fillimi i një beteje që do të konsiderohet e fituar kur të kemi një qeveri e Parlament të dalë nga vota e qytetarëve.”

Për opozitën, tha ai, objekitivi politik është i qartë, largimi një orë e më parë i kësaj qeverie me zgjedhje të lira e të ndershme, që do i paraprijë një reformë zgjedhore.

“Kushti i parë është miratimi i Reformës Zgjedhore. Është i vetmi kusht ku opozita ka një rol për të luajtur, dhe e ka luajtur me vetëdije të plotë, në shërbim të një interesi të vetëm, të qytetarëve shqiptarë. Po të ishte për interesa meskine kishte dhjetëra rrugë të tjera, që i kemi refuzuar me përbuzje. Kurrë s’ka qenë më ulërtise kërkesa për ndryshim. Ditë për ditë zbulohen kryebashkiakë me rekorde kriminale, qytetarët bien viktima të sundit të krimit.”

Rruga e vetme për të dalë është të bashkojmë forcat, e çdo force politike, qytetari, pensionisti, shoqëri civile, studenti, për të vendosur edhe këtu ato standarde. E gjitha kjo është produkt i bashkëjetëses së politikës me krimin, dhe grabitjes së gjithçkaje, nga një grusht njerëzish. Kjo është partia e babëzisë. Mundja e tyre, dhe shporrja nga zaptimi i institucioneve është synimi i vetëm i opozitës.”

Pas marrëveshjes për Reformën Zgjedhore, sqaroi Kryetari i Partisë Demokratike, nuk do të ketë asnjë kompromis dhe 15 mars është afati i fundit ku opozita nuk do të tolerojë asnjë zvarritje apo përpjekje për ta ndaluar miratimin e Reformës Zgjedhore.

”Nuk do të ketë asnjë kompromis. Kush ka diçka për të dhënë në këtë proces dyert i ka të hapura. Këshilli Politik do të krijojë mundësi dhe hapësirë për kontribut për mendime dhe sugjerime çdo faktori tjetër, shoqërinë civile apo grupet e interesit për të nxjerrë Shqipërinë nga kjo situatë ku e ka zhytur

Të vihet menjëherë në jetë mekanizmi dhe të goditet çdo përpjekje për t’i lënë këto 2 muaj pa asnjë zhvillim, për të zvarritur këtë gjendje dhe Rama me plaçkitësit të vijojnë të grabisin qytetarët, bizneset, doganat, portet etj. Emergjencë kombëtare për të larguar këtë qeveri. Nuk tolerojmë asnjë vonesë, siç është rënë dakort më 15 mars.”
Lulzim Basha e pranoi se ka nga ata që kanë dyshime dhe ka nga ata që kanë humbur shpresën.

“Asnjëherë në këto 7 vite s’kanë qenë kaq të qarta synimet e opozitës dhe aleatët perëndimore. Që Shqipëria mos e vonojë trenin e integrimit, punësimit, rritjes së ekonomisë.

Këto 7 vite na kanë sjellë para dy zgjedhjeve. Bardhë e zi. Të vazhdojmë në këtë rrugë, në rrugën e dështimit total, varfërimit, dorëzimit, pafuqisë, para një grushti njerëzit që kanë marrë peng Shqipërinë. Apo të përdorim gjithë fuqinë për t’i dhënë shqiptarëve. Kjo nuk ndodhet në dosjet e kryetarëve të partive apo në dollapët e partive. Detyra jonë që t’ju japim forcën që të shkyçni këtë energji.
Të kthejmë potencialin e jashtëzakonshëm për ta bërë Shqipërinë në një vend me standarte europiane në zemër të Europës.”

Pas reformës zgjedhore…

Pas reformës zgjedhore e cila duhet të përfundojë më 15 mars, objektiv i radhës i Opozitës së Bashkuar, tha Basha, do të jenë zgjedhjet e parakohshme parlamentare në një ditë me ato lokale.

“Çdo ditë që kalon me këtë gjendje politike, është një ditë e zezë për Shqipërinë, është objektiv që pas Reformës Zgjedhore, të shtyjmë për zgjedhje të parakohshme, në një ditë me ato loklae, dhe të kemi qeveri nga qytetarët jo nga bandat dhe institucione që të kenë kujdesin te qytetarët dhe jo të pasurimi tyre,”  u shpreh Basha i bindur se opozita ia doli të grisë perden e propagandës së shtrenjtë qeveritare dhe t’i tregojë botës mbarë nevojën akute për ndryshim me aksionin e nisur prej 16 shkurtit të vitit të kaluar.

I pyetur se çfarë fitoi opozita nga ky aksion, Basha tha se në fakt aksioni ishte fitore për shqiptarët.

“Mendoj se pyetja duhet shtruar se çfarë fitojnë shqiptarët. Shqiptarët fitojnë domosdoshmërinë e rishikimit të kushteve, të rregullave të lojës, që do iu mundësojë të votojnë të pandikuar nga krimi. Gjithashtu, të hapet rruga për zgjedhje të parakohshme parlamentare dhe lokale në një ditë. Pra, pa aksionin tonë të 16 shkurtit, sot do të gjendeshim në një situatë, ku propaganda dhe milionat e krimit dhe oligarkisë do të pikturonin një Shqipëri pa probleme, pavarësisht se vendi është në krizën më të thellë ekonomikisht dhe nga ana e shpopullimit. Thënë me një fjali besoj se ja dolëm ta grisim perden e propagandës së shtrenjtë qeveritare dhe t’i tregonim botës mbarë nevojën akute për ndryshim.”

Në fund sqaroi dhe faktin e shumëpërfolur nëse kjo Marrëveshje ishte një konsensus në mes të mazhorancës dhe opozitës për zgjedhje: “Jo, se po të ishte do ta kishim raportuar si të tillë. Është objektiv i shpallur nga opozita e bashkuar, për të cilin do të mobilizojmë çdo forcë, qytetarët. Këtu janë dy axhenda krejtësisht të ndryshme, axhenda e Ramës të qëndrojë sa më shumë në pushtet dhe axhenda e opozitës dhe qytetarëve për të bërë zgjedhje të lira e të ndershme sa më shpejt,” tha Kryetari I Partisë Demokratike, Lulzim Basha duke e bërë të ditur se për takimin e djeshëm ndërkombëtarët janë angazhuar nga muaji dhjetor duke I bërë presion mazhorancës për të pranuar tre kushtet e opozitës.