“Legjitimimi i Damian Gjiknurit”, Basha: Tezë e dalë nga kancelaria e Edi Ramës! S’ka amnisti…
Të pavërteta, naive dhe propagandë e Edi Ramës i konsideroi sot Kryetari i Partisë Demokratike, Lulzim Basha, akuzat për inkoherencë qëndrimesh pasi, siç iu tha edhe sot me rastin e daljes së tij publike, se ka legjitmuar atë që për shumë kohë e ka cilësuar si simbolin e krimit elektoral, Damian Gjiknurin; Ndërsa u zotua se nuk ka amnisti për askënd që është përfshirë në shitblerjen e votave.
“Nuk ka asgjë më të pavërtetë dhe naive se kjo. Mund të rri këtu e të habitem sesi propaganda e Ramës ka arritur në këto nivele apo naiviteti i njerëzve ka arritur në këto nivele, por kjo nuk është detyra ime. Detyra ime është t’ju tregoj fare qartë se teza se “u legjitimua Damian Gjiknuri” është një tezë e dalë direkt nga kancelaria e Edi Ramës dhe e shpërndarë përmes renegatëve dhe patericave të tij, pre e të cilës mund të ketë rënë edhe ndonjë naiv apo ndonjë person që ka pritshmëri jorealiste dhe revolucionare për mënyrën sesi duhet të ndryshojë Shqipëria.”
Shqipëria, garantoi Lulzim Basha, do të ndryshojë përmes të njëjtave mekanizmave që ndryshon dhe përparon Europa.
“Njëri prej këtyre mekanizmave është zbatimi i ligjit. Përsa i përket pyetjes konkrete, më lër të të jap një përgjigje fare konkrete. Në kushtet e Bundestagut është edhe ‘fillimi i ndjekjes penale dhe proceseve gjyqësore kundër atyre që lidhen me blerjen e votave në zgjedhje dhe ndjekjen serioze e të shpejtë të procedimeve.’ Në rezolutën e PPE-së ky kusht është forcuar edhe me ‘arrestimin e përsonave të kapur në përgjime duke vjedhur votat.’ I njëjti kusht përsëritet edhe nga Unioni Demoktatik Ndërkombëtar, ku, përveç Partive Popullore Europiane, përfshihet edhe partia në pushtet e SHBA dhe partia në pushtet në Britaninë e Madhe.”
Duke parë në sy qytetart, tha Kryetari i Partisë Demokratike, siguroi se nuk ka për të patur amnisti as për Damian Gjiknurin, as për Imer Lalën, as për Vangjush Dakon, as për Avdylajt, për askënd që është përfshirë në shitblerjen e votave.
“Dërgimi i tyre para drejtësisë dhe aty ku e kanë vendin është prioritet absolut i PD-së, i opozitës së bashkuar dhe institucioneve euroatlantike. Ju lutem ta kuptoni realitetin, ashtu siç është. Këta janë të gjithë ushtarë të Edi Ramës. Stigmatizimi i procesit të reformës zgjedhore, nuk është gjë tjetër veçse rënie viktimë e kësaj propagande.”
Synimi im është të largojmë fenomenin e Edi Ramës, personin e Rdi Ramës, qeverinë e Edi Ramës, bandat e Edi Ramës, tha Kryetari i Partisë Demokratike, Lulzim Basha, në mënyrë që krijohen kushte që kurrë më, asnjë parti politike, asnjë individ të vendosë shqiptarët dhe Shqipërinë në kushte pengmarrje nga krimi ndërsa përfundoi: Për këtë, ne kemi një hartë rruge, një udhërrëfyes solid që është rezoluta e Bundestagut për të cilën dje kemi dhënë kontributin tonë, duke krijuar një proces për Reformën Zgjedhore: 1. jashtë parlamentit ilegjitim antikushtetues; 2. me konsnesus të forcave politike; 3. që do të kalojë pa asnjë ndryshim, pas miratimit në nivelin politik.
