Çelja e negociatave, Komisioneri Varhelyi: Pa opozitën është e pamundur…

Komisioneri për Zgjerim i BE-së, Olivér Várhelyi,  pas vizitës në Paris dhe takimet që kishte me përfaqësuesit holandezë, shpreson shumë që negociatat do të çelen përpara Samitit të Zagrebit, e për këtë tha se po punojnë me kryeministrin dhe shtetet anëtare, si dhe shtoi se pa mbështetjen e opozitës shqiptare nuk do të jetë e mundur të ketë përparim.

“Kam qenë në Paris, kam patur takime edhe me përfaqësuesit holandezë, dy shtete që kanë shprehur shqetësime. I kemi diskutuar këto shqetësime, nderkohë unë po bisedoj më të dyja këto shtete që u ndikuan nga samiti i tetorit. Po përpiqem të shoh ecurinë e përparimin që është arritur tashmë, dhe se e cfarë do të mund të arrihet. Jam shpresë plotë që me metodologjinë e re, me qasjen e re, që do të ribalancojë negociatat për anëtarësim, dhe po ashtu me përparimin në Shqipëri e Maqedoninë e Veriut, do të mund të ndryshojmë klimën politike. Pra, jam shumë shpresë plotë, po punojmë fort me vendosmëri që kjo gjë të ndodhë,” tha Komisioneri për Zgjerimin duke e pranuar se pa opozitën kjo nuk është e mundur dhe për këtë çështje do të zhvilloj edhe bisedime:

“Duhet që gjitha partitë politike në vend të ndihmojnë për ta bërë këtë realitet se është e qartë që pa mbështetjen  të gjitha partive nuk do të jetë e mundur të ketë përparim dhe unë do të flas edhe me opozitën sot që të na ndihmojë që këtë cështje ta bëjmë sukses dhe ta përdorim këtë mundesi edhe më tej pasi të jenë çelur negociatat.”

Komisioneri ka vlerësuar punën e bërë me vetingun, duke theksuar se “ Vetingu ka treguar vendosmërinë por edhe rezultat për të zbatuar këtë reformë, mirëpres marrëveshjen për reformën zgjedhore dhe ky është një gur shumë i rëndësishëm, janë lajme të mira, por ka ende sfida përpara, duhet të bëjmë shumë për të luftuar krimin e organizuar, korrupsionin e për këtë duhet të punojmë së bashku”.

Ndërsa kryeministri Edi Rama përsëriti edhe një herë qëndrimin e tij se vendimi nuk varet plotësisht nga dy vendet nga metodologjia e BE për zgjerimin.

“Përsëris atë që nuk do lodhem së përsërituri, ajo që ne na takon është të bëjmë gjithçka që ne kemi në dorë e të garantojmë ecurinë e reformave pasi të gjitha ato që kërkohen nga BE, ne nuk i bëjmë për BE po për të ardhmen e vendin tonë, për fëmijët tanë. Nëse ka një arsye madhore, për të qenë të përfshirë në këtë proces, kjo arsye është përputhshmëria e plotë e këtyre objektivave të vendosura në procesin e integrimit, me nevojën që vendi ka dhe që fëmijët tanë kanë për nesër. Vendimin do ta marrë KiE, por cilido qoftë ne do vijojmë të bëjmë të njëjtën gjë, të ecim sa më shpejt me sa më shumë rezultate në ndërtimin e Shqipërisë europiane.”

Me këtë rast, Komisioneri për Zgjerim u BE-së, Olivér Várhelyi kishte dhe një lajm të mirë.

“Ju jap edhe një lajm të mirë, duke pasur parasysh punë e mirë të bërë nga Shqipëria nga fondet e paraaderimit, kemi mundësi të japim 28 mln euro për shpërblim për performancën e mirë që është bërë. Lajm të mirë edhe nga PE, por ai ka një procedurë që duhet ta ndjekë, por propozimin e kemi cuar në PE dhe besoj se gjithçka do të vazhdojë shumë shpejt.”