Në vitin 2019 policia goditi 37 grupe kriminale

Drejtori i Policisë së Kosovës, Rashit Qalaj, duke prezantuar të arriturat, statistikat dhe aktivitetet e policisë gjatë vitit 2019, e ka cilësua si vit të suksesshëm.

“Kemi bërë një punë mjaftë të madhe në parandalimin e veprave penale, kemi ofruar siguri për të gjithë qytetarët si dhe kemi tejkaluar një mori sfidash. Konsideroj se sfidat janë tejkaluar mjaft mirë edhe në bashkëpunim me institucionet tjera. Kemi arritur që të zvogëlojmë krimin, sidomos në fushën e veprave penale, kemi arritur që të merremi me shumë hetime mjaft komplekse të veprave penale të ndryshme qoftë në fushën e terrorizmit, apo të krimeve të rënda,” tha Qalaj duke konstatuar:

“Viti 2019 është një nga vitet më të suksesshme të Policisë se Kosovës dhe besoj se me këtë trend do ta vazhdojmë edhe këtë vit, në mënyrë që të kemi bashkëpunimin me qytetarët dhe të ofrojmë siguri. Qysh në fillim të vitit kemi ndërmarrë disa hapa me ndryshimin e strukturës pastaj me plotësimin e personelit dhe eprorëve, në kuadër të strukturës organizative”.

Drejtori i Policisë së Kosovës tha se policia ka trajtuar një numër të madh të çështjeve ndërsa numri i aksidenteve të trafikut ka pësuar rritje për 2.17 për qind

Sa i përket krimeve të rënda dhe krimit të organizuar, shqetësuese ngelet trafikimi me narkotik – janë trajtuar mbi 1 mijë raste, janë neutralizuar 37 grupe kriminale si dhe janë konfiskuar sasi të konsiderueshme të narkotikeve.

Gjithashtu u tha se viti 2019 ka shënuar rritje të veprave penale të krimeve kibernetike, krimeve ekonomike dhe atyre me fajde.

Sipas Policisë së Kosovës ky vit gjithashtu ka shënuar rritje te konsiderueshme edhe të kalimit ilegal të shtetasve nga vendet e treta.