Rreziku “Aleksandar Vuçiç”, opozitarja serbe jep zgjidhjen…

Në prag të firmosjes së Mini Shengenit dhe zgjedhjeve të përgjithshme në Serbi, kur Aleksandar Vuçiç nuk është më rrezik vetëm për shqiptarët dhe boshnjakët por edhe vetë serbët, dhe sot i ka mbetur të shpallet vetëm president i përjetshëm, opozitarja e përjetshme si me regjimin e Millosheviçit ashtu dhe atë aktual, liderja e Lëvizjes Qytetare, Vesna Peshiç, jep zgjidhjen praktike dhe të vetme: Tub hekuri kokës!

“Hajde bre t’ju shoh çfarë do të bëni kur ai të shpallet president i përjetshëm. Derisa twitteristët pa u shqetësuar postojnë twitte. Për këtë nuk mendoni. Ja Putini po e bënë pikërisht këtë gjë. Nëse Bërnabiç jep dorëheqje, pritet Vuçiçi i përjetshëm. E këtu s’ka bojkot, vetëm tub hekuri kokës.”

Këtë postim, Vesna Peshiç u detyrua ta fshijë nga profili i saj pas kryqëzimit që i bëri propaganda e vuçiçëve dhe mediat që ka nën kontroll, duke e akuzuar për “thirrje për vrasjen e presidentit” ndërkohë reaguan edhe ministri i Brendshëm, Nebojsha Stefanoviç, i cili i bëri thirrje prokurorisë të reagoj ndërsa Drejtori i Zyrës për Kosovën pranë Qeverisë së Serbisë, Marko Gjuriç, si kriminel me përvojë ishte paksa më i ashpër:

“Duke i premtuar presidentit Aleksandar Vuçiç përmes twitterit ‘tub hekuri kokës’, edhe një herë dëshmoi se është ekstremiste politike e papërgjegjshme, dhe në asnjë mënyrë përfaqësuese e të ashtuquajturës Serbi qytetare,” tha Marko Gjuriç duke shtuar se një retorikë e tillë terroriste e ish-lideres opozitare dëshmon se as ajo dhe aleatët e saj politik nuk kanë qenë kurrë luftëtarë për një Serbi normale, por thjeshtë kanë gjuajtur lekët dhe privilegjet.

“Turp të ketë!” përfundon Marko Gjuriç, njeriu që retorikën terroriste e ka gjuhë amtare ndonëse shihet qartë se të vrasësh shqiptarë, sipas këtij krimineli, nuk qenka terrorizëm!

“Urdhërat” e Stefanoviçit dhe Gjuriçit i zbatoi menjëherë Prokuroria e Beogradit e cila urdhëroi Drejtorinë për krimin teknologjik të hetoj deklaratën e kontestuar të Vesna Peshiçit që është publikuar në rrjetin social Twitter.

“Prokurori publik ka urdhëruar që të merren masa në përputhje me ligjin. Do të bëhen verifikime nëse ka elementë të veprës penale,” tha për Agjensinë shtetërore të lajmeve Tanjug, zëdhënësja e prokurorisë, Irena Bjelosh.  

Ndryshe, kjo që propaganda dhe mediat në shërbim të Vuçiçit e pasqyruan si “kërcënim me jetë Presidentit të Serbisë” dhe u bë vetëm dy ditë para firmosje së paralajmëruar të Mini Shengenit në Beograd, ndonëse u sqarua nga Vesna Peshiç se çfarë ka dashur të thotë për Serbinë e Aleksandar Vuçiç që tashmë ka në dorë tokën, ujin dhe ajrin e serb, nuk arriti ta shuaj propagandën dhe reagimin e militantëve radikal serbë.

Sociologia e njohur serbe dhe ish-politikania Vesna Peshiç ka sqaruar përmes rrjetit social Twitter se as që i kishte ra ndër mend ta kërcënoj Aleksandar Vuçiçin.

“Ja mu gjuajtën mua në TV Pink se dua ta vras presidentin. E unë mendoja ta vras veten. Gjithçka duan ta kthejnë në sulm, vërtetë e jashtëzakonshme. Madje kam fshirë edhe atë twitt, për të mos ardhë deri tek sulmet e tilla me regji të sajuara,” sqaron Peshiç përmes një postimi tjetër në rrjetin social Twitter.

Por “sulme” të tilla dhe kërcënime me jetë nuk kanë munguar ndaj Presidentit Vuçiç i cili deri më sot ka lënë gjurmë të mëdha kriminale ndonëse për ringjalljen e ekonomisë është ndihmuar shumë nga Anglela Merke dhe Tayipp Recep Erdogan.

Kohë më parë revista serbe NIN dhe e përditshmja serbe “Danas” në faqen e parë kishin foton e Aleksandar Vuçiçit nën shënjestrën e snajperit, që gjithashtu nga propaganda e Presidentit të Serbisë u cilësuan si kërcënime me vdekje  dhe thirrje për vrasje.

Thirrje të ngjashme nuk mungojnë çdo ditë në rrjetin social Facebook, dhe derisa ato dita ditës filluan të shtohen në Serbi, u sajuan dhe ca matanë kufirit si në Republika Srpska dhe Kosovë, sikur ai kërcënohet edhe për vendosjen e paqes.

Kështu Mllagjan Brandor Rangjeloviç, i cili është deklaruar publikisht si ithtarë i ekstremistit serb, Boshko Obradoviç, në rrjetin social Facebook shkruante:

“Ishte edhe një Aleksandar i cili udhëhoqi Serbinë para më shuëm se 100 viteve dhe përfundoi siç do të përfundoi edhe ky mu*,” për të bërë thirrje në postimin e radhë në vrasjen e presidentit: “Urgjent mu*i të heqet qafe…”

Por Vuçiç nuk qëndroi duarkryq, përveç masave ligjore sajoi dhe kërcënime matanë kufirit. Kështu më 30 tetor 2019, ministria e Brendshme në Republikën serbe të Bosnjes arrestoi Marinko Milosheviçin me dyshimin se ka kërcënuar me vdekje Aleksandar Vuçiçin. Fjala ishte për disa postime në Facebook që ishin dërguar na profili “maca, maca” edhe pse dihet që krimet e Vuçiçit në Kroaci dhe Bosnje nuk ka rrjet social që mund ti zbeh pavarësisht pendimeve dhe faljeve publike që ka bërë dhe sot që “kërcënohet” nga serbët për vendosjen e paqes. 

Ishte dhe deputeti Slavisha Ristiç i cili i dërgoi letër Presidentit të Rusisë, Vladimir Putin, ku kërcënohet presidenti i Serbisë, Aleksandar Vuçiç se nëse do të arrijë paqe dhe firmos marrëveshjen me Prishtinën, do të përfundoj si kryeministri i vrarë serb Zoran Gjingjiç; Dhe, kjo letër përfundoi në mediat serbe edhe pse dihej që marrëveshja e pretenduar nga Vuçiçi parashikonte ndarjen e Kosovës me  ndihmën e, siç deklaroi Kryeministri i Kosovës, Ramush Haradinaj, Kryeministrit Edi Rama.

Dhe në fund, është sajuar një faqe anonime “KM novine” ku propagandohet “ruajtja e tokës serbe, Kosovës” dhe ku Vuçiç përveç se akuzohet në kohën e realizimit të projektit të ndarjes së Kosovës, kërcënohet edhe me vdekje.

“A ekziston zgjidhje tjetër për Vuçiçin përveç se plumbi?” ishte njëri nga shkrimet ku autorët bëjnë thirrje për vrasjen e Aleksandar Vuçiçit edhe pse dihet se në Kosovë, Presidenti i Serbisë nuk ka pothuajse fare opozitë. Ata që kishin guximin të ngrenë kokën, zgjoheshin me shpërthime të bombave para portës së shtëpisë ose në rastin më të mirë nën makinën e parkuar.