Pas 7 viteve në pushtet, premtojnë zbardhjen e 21 Janarit nga drejtësia e re që “liroi” Dritan Dajtin
Kanë kaluar 7 vjet që janë në pushtet dhe sot sërish manipulojnë me viktimat e 21 Janarit 2011, që pësuan në protestën e organizuar nga Partia Socialiste, duke premtuar zbardhjen e plotë dhe ndëshkimin e autorëve.
Në mungesë të Kryeministrit Edi Rama, kryetari i Grupit Parlamentar të Partisë Socialiste, Taulant Balla ka pritur në një takim në Kryeministri familjarët e 4 viktimave që humbën jetën në protestën e 21 Janarit dhe bënë homazhe në vendin e vrasjes, por nga reagimi i shprehur në rrjetin social Facebook u pa qartë se mungesa e Kryeministrit nuk la gjurmë. Retorika ishte po ajo e 7 viteve me radhë:
“Sot 9 vite nga 21 Janari 2011! Nderim dhe respekt dëshmorëve Ziver Veizi, Faik Myrtaj, Hekuran Deda dhe Aleks Nika, të cilët u qëlluan pabesisht në protestën popullore, në mbrojtje të vlerave dhe parimeve të demokracisë në Shqipëri. Shqiptarët presin nga Drejtësia e re zbardhjen e plotë dhe ndërshkimin e fajtorëve për këtë krim të rëndë.”
Pra, partia në pushtet dhe jo shqiptarët, presin nga Drejtësia e re zbardhjen e plotë të ngjarjes dhe ndëshkimin e autorëve të 4 viktimave 21 Janarit ndërkohë është kjo “drejtësi e re” e cila anuloi burgun e përjetshëm për Dritan Dajtit që vrau 4 policë!
Ndryshe, në protestën tragjike të 21 Janarit mbetën të vrarë: Aleks Nika, Ziver Veizi, Hekuran Deda dhe Faik Myrtaj. Gjykata vlerësoi se vrasja e Ziver Veizit, Faik Myrtajt dhe Hekuran Dedajt ka ndodhur nga pakujdesia dhe dënoi ish-komandantin e Gardës, Ndrea Prendi me një vit burg, si dhe gardistin Agim Llupo me 3 vite. Ajo që nuk është përcaktuar ende është arma nga u qëllua Aleks Nika, sepse plumbi që kishte bërë rikoshet rezultoi mjaft i dëmtuar.
