Haradinaj: Pajtimin me Serbinë e këmbejmë vetëm me njohje të shtetit të Kosovës

Kryeministri i Kosovës, Ramush Haradinaj ka deklaruar se Kosova do të pranojë pajtimin me Serbinë në këmbim të njohjes, raporton Kosovapress, duke shtuar se kjo nuk do të thotë se do harrohen krimet e bëra. Ka folur edhe për anëtarësimin në INTERPOL.

“Njohja. Çka mund të japë Kosova që të arrihet kjo marrëveshje, një pajtim, se tjetër nuk kemi çka japim. Pajtimi nuk është pak, do të thotë të kalosh mbi dhimbjen tonë, mbi të zhdukurit, mbi të vrarët, mbi dëmet, mbi dhunimet seksuales, me ekonomi të shkatërruar e të plaçkitur, e kur ne të pajtohemi, po japim shumë, më shumë se që dikush kish mujt me dhanë. Nuk po themi me harru, se nuk e bëjmë kurrë, por ne mund të pajtohemi ndonjëherë, për njohje. A është ky viti për këtë? Nuk mund të ngutem të them për këtë, por ne kemi kërkuar ndihmën e miqve tanë dhe po ju tregoj që Kosova kur qëndron pas Amerikës, e bënë për interesin e vet”, tha ai.

Haradinaj tha se ky është viti kur Kosova duhet anëtarësohet në INTERPOL ndërsa u shpreh i bindur se do të ketë vende që do të kërkojnë anëtarësimin e Kosovës në këtë organizatë.

“Çdo vend që e pengon Kosovën të anëtarësohet në INTERPOL është kah e ndihmon luftimin e krimit trans-nacional. Është gabim. Kush don me luftu krimin trans-nacional e ndihmon Kosovën me u anëtarësu në INTERPOL. Këtë vit është koha kur duhet të vendoset kjo punë. Jam thellë i bindur që plotë vende kanë me kërku anëtarësimin e Kosovës në INTERPOL se ashtu luftohet krimi trans-nacional që është i rrezikshëm, është kërcënim”, tha ai duke bërë të ditur se ka kërkuar nga shtetet mike të ndihmojnë Kosovën të anëtarësohet në Interpol.

Duke folur për anëtarësimin e Kosovës në OKB, Haradinaj tha se shpejt duhet mbyllet edhe kjo çështje.