Skadon ultimatumi Isës, sot vendoset për koalicionin qeverisës
Në mesnatë ka skaduar ultimatumi i Kryetarit të Lidhjes Demokratike të Kosovës, Isa Mustafa, për Lëvizjen Vetëvendosje. Sot pritet të deklarohen palët lidhur me koalicionit qeverisës, për të cilin nuk kishte dakordësi edhe pas më shumë se tre muaj negociatash.
Nënkryetari i Lidhjes Demokratike të Kosovës, Lutfi Haziri, në ditën e fundit të ultimatumit për Lëvizjen Vetëvendosje përmes rrjetit social Facebook është shprehur se një ndarje e drejtë dhe e balancuar e pushtetit mbi parimet e mirëbesimit do të bënte që programi qeverisës, me Lëvizjen Vetëvendosje si udhëheqëse e Qeverisë dhe LDK-në si udhëheqëse e Parlamentit, mënyrë kjo për i dhënë fuqi koalicionit.
“Apeloj të kemi edhe pak durim, sepse këto konsultimet e brendshme na mundësojnë që të eliminojmë çdolloj pengese dhe çdolloj bombe të kurdisur të mandatit 4+”, thekson Haziri.
Ndryshe, në rast të arritjes së Marrëveshjes për koalicion qeverisës, më të fituarit do të jenë Lëvizja Vetëvendosje dhe Lidhja Demokratike e Kosovës, pavarësisht teorive mbi mirëqenien e qytetarëve. Në rast të përmbylljes së negociatave, elektorati i këtyre dy subjekteve fituese nuk do të ketë më rastin të dëgjoj shfrenime të pakuptimta politike, të cilat deputetët fitues të këtyre dy partive i shfaqnin përmes rrjeteve sociale, cilësime që nuk i kanë përdorur as ndaj armikut tonë shekullor, Serbisë!
Presidenti i Kosovës, Hashim Thaçi, ka mandatuar Albin Kurtin, kreun e Lëvizjes Vetëvendosje për formimin e Qeverisë së re dhe afati kushtetuese për formimin e saj skadon më 4 shkurt.
