Miratohet axhenda për Reformën Zgjedhore, Bylykbashi: Ky dokument hap rrugën…
Këshilli Politik sot ka miratuar axhendën e Reformës Zgjedhore duke përcaktuar dhe afatet deri tek produkti final. Pas mbledhjes përfaqësuesi i Partisë Demokratike në Këshill, Oerd Bylykbashi, tha se me këtë dokument të sotëm dhe metodologjinë që ai përfshin, i hapet puna rrugës konkrete për të diskutuar dhe miratuar propozime për Reformën Zgjedhore
”Sot ne miratuam axhendën e Reformës Zgjedhore duke përcaktuar edhe afate gjatë së cilës, përgjatë këtij procesi kur do të ketë kontribute dhe miratim të paketave të ndryshme. Ajo që ka rëndësi është se me këtë dokument të sotëm dhe metodologjinë që ai përfshin, i hapet puna rrugës konkrete për të diskutuar dhe miratuar propozime për Reformën Zgjedhore.”
Opozita, tha Bykylbashi është e angazhuar maksimalisht për të ecur me shpejtësi me drafte, me propozime konkrete, duke marrë në konsideratë punën që është bërë gjatë gjithë kësaj periudhe në Komisionin e Reformës Zgjedhore që në kohën kur opozita ishte palë e atij Komisioni.
“Dokumenti i sotëm përfshin të gjitha çështjet që kemi ngritur politikisht në Këshillin Politik, ku do të përfshihen, çështja e shitblerjes së votës, ndarjes së politikës nga krimi, probleme të rënda zgjedhore që ndryshojnë dhe manipulojnë votën e shqiptarëve; çështja e sistemit zgjedhor.”
Duke saktësuar se në këtë dokument janë përfshirë të gjitha masat që kanë si emërues të përbashkët, elementin e vullnetit politik për të ndarë shtetin nga politika, shtetin nga partitë politike, Përfaqësuesi i PD në Këshillin Politik, Oerd Bylykbashi, përfundon:
“Një angazhim dhe një standard i OSBE-së pa të cilin çdo kornizë ligjore pëson fatin e ndryshimeve që janë bërë deri më sot. Ky është thelbësor në procesin që po nisim që nga sot.”
Ndryshe, pavarësisht prioriteteve të shprehura nga palët, grupi i ekspertëve duhet të fillojë menjëhere nga puna për çështjet për të cilat palet bien dakord se duhen trajtuar me prioritet në mënyrë të menjëhershme, ndërkohë që çështjet e tjera mbeten për t’u diskutuar më tej në Këshillin Politik.
Për çështjet që do të ketë dakordësi të plotë dhe të përgatitura në nivel teksti ligjor të dakordësuar, draftet do të dërgohen për opinion paraprak tek ODHIR.
Reforma zgjedhore duhet të mbyllet brenda datës 15 mars 2020.
