Pompeo i shkruan Kurtit, taksa dhe njohja e ndërsjellë me Serbinë, prioritete!
Sekretari amerikan i Shtetit, Mike Pompeo i është drejtuar përmes një letre kryeministrit të Kosovës, Albin Kurti, duke theksuar se shpreson që prioritetet e liderit të ri të jenë heqja e tarifës 100 për qind në importet e Serbisë dhe Bosnje-Hercegovinës, dhe njohja e ndërsjellë me Serbinë.
“Heqja e tarifave në mallrat e Serbisë dhe Bosnje-Hercegovinës do të jetë e rëndësishme për kthimin e palëve në tavolinën negociuese. Ne shpresojmë dhe presim që ju do ta bëni këtë gjë prioritet dhe do të përfitoni nga momentumi i krijuar pas dy letrave të qëllimit për të krijuar lidhje ajrore dhe hekurudhore në mes të Prishtinës dhe Beogradit,” tha Pompeo në letrën, të cilën Zyra e kryeministrit e ka konfirmuar për RFE se e ka pranuar.
Mike Pompeo me këtë rast u është referuar dokumenteve të nënshkruara nga zyrtarë të Kosovës dhe Serbisë, në Berlin, me ndërmjetësim të të dërguarit të Shtëpisë së Bardhë për dialogun mes Prishtinës dhe Beogradit, ambasadorit amerikan në Berlin, Richard Grenell ndërsa sa i përket njohjes së ndërsjellë mes Kosovës dhe Serbisë, Pompeo tha:
“Tani është koha që të realizoni marrëdhënie normale me Serbinë, që kanë qendër njohjen e ndërsjellë, dhe e cila është thelbësore për integrimin e plotë ndërkombëtar të Kosovës. Shtetet e Bashkuara do të qëndrojnë afër jush për t’iu mbështetur në këtë proces”.
Sekretari amerikan ka uruar kryeministrin Kurti për formim të qeverisë së re, rapoton RFE, duke theksuar se Departamenti i Shtetit do të punojë së bashku me të për të përparuar në qëllimet e përbashkëta siç janë: rritja ekonomike dhe sundimi i ligjit.
Letra e Sekretari amerikan i Shtetit, Mike Pompeo, vjen 10 ditë pas formimit të Qeverisë së Kosovës dhe dy ditë pas deklaratave intensive të Dërguarit Special të Presidentit Trump për dialogun Kosovë-Serbi, dhe zëdhënësit të tij, Dick Custin, se taksa 100 duhet të heqet pa kushte.
Ndryshe, Kryeministri i Kosovës, Albin Kurti, për taksën ndaj produkteve serbe, përveç se premtim elektoral e ka përmendur edhe pas zgjedhjes si Kryeministër do ta zëvendësojë me masën e reciprocitetit.
