Mimozat e arta, çfarë simbolike kanë dhe si t’i ruani gjatë?

Të përkëdhelurat e diellit dimëror kanë çelur dhe hijeshojnë mrekullisht, mimozat.

Janë të parat lule pemësh që me pamjen dhe aromën madhështore sinjalizojnë që nuk ka mbetur edhe shumë dimër.

Lulet e mimozës janë nga më të dashurat e shqiptarëve. Por, jo vetëm – kultura të ndryshme anembanë globit i vlerësojnë mimozat si ndër lulet më shprehëse.

Për shumë qytetërime, mimoza do të thotë pastërti, liri, ndjeshmëri dhe bukuri.

Mimoza është nga lulet më të dashura dhe simbolike të gjinisë emërore

Në fillim të shekullit të 20-të në Angli, vajzat vendosnin një degëz mimoze në jakën e xhaketës ose e kapnin në flokë për të dhënë mesazhin e një femre të lirë dhe të pavarur.

Fiset vendase amerikane e kishin traditë që meshkujt t’i dhuronin një degëz mimoze të zgjedhurës së zemrës.

Prandaj, nuk është aspak rastësi që mimoza u bë sinonim i vajzave dhe grave, delikatesës dhe fuqisë femërore.

Kjo sepse, aspekti delikat i kësaj luleje fsheh fuqinë dhe vitalitetin e gruas. Ky është edhe motivi kryesor për të cilin mimoza është bërë simbol i forcës, energjisë dhe feminilitetit.

Ngjyrat e mimozës, plot jetë dhe ngazëllim, janë domethënie e veçantë e festës së gruas dhe janë kuptimplotë. Dhurojani një gruaje si vlerësim për çdo të mirë që vjen prej saj.

Mimoza është një pemë që është importuar në Europë në fillim të shekullit të 19-të nga Australia. Në Shqipëri ajo ka gjetur klimën ideale për rritje dhe zhvillim.

Ajo është lulja që thyen zymtësinë e gjatë të dimrit për të sjellë gëzimin e pranverës.

Në Shqipëri, mimoza rritet spontanisht në mbarë vendin, sidomos në treva me klimë më të butë, pasi mimoza nuk e duron dot gjatë ngricën dhe të ftohtin. Prandaj, mimoza çel lulet magjike të verdha që me rrezet e para të diellit.

Pema e mimozës parapëlqen tokën me kullim të mirë. Me emrin botanik Acacia dealbata, ajo është një pemë në familjen e Mimosaceae.

Këshillat më të mira për jetëgjatësinë e degëve të mimozave në shtëpitë tuaja

Për të ruajtur për një kohë më të gjatë bukurinë delikate të mimozave, vendosini degëzat të palidhura në një enë të përshtatshme me ujë, ku të keni hedhur disa pika lëng limoni.

Vazon me mimoza duhet ta vendosni në një mjedis ku e kap drita natyrale. Llogarisni të përdorni 5-6 pika lëng limoni për çdo litër ujë.

Vazon me mimoza mbajeni në ambiente të freskëta dhe kujdesuni që kërcejtë e lules të jenë gjithmonë të mbuluara nga uji.

Aroma e mimozave do t’ju mrekullojë ditën dhe mjediset tuaja do të rrezatojnë optimizëm./AgroWeb/