“Zbardhja” e Draftit paraprak të Venecias, Ambasada e SHBA: Respektoni konfidencialitetin…
Pas zbardhjes së disa pjesëve nga Drafti paraprak ku thuhet se Komisioni i Venecias i jep të drejtë Presidentit dhe shprehet se nuk ka bazë për shkarkimin e Presidentit lidhur me këtë çështje ndërsa hedhen hije dyshimi mbi mënyrën e veprimit të Këshillit të Emërimeve në Drejtësi, ka reaguar Ambasada e SHBA në Tiranë duke i bërë thirrje të gjitha palëve që të respektojnë procesin e Komisionit të Venecias, përfshi kërkesën për konfidencialitet të projekt-opinionit deri sa të finalizohet ndërkohë mirëpresin deklaratën e bërë nga Presidenti Meta duke afirmuar rëndësinë e një vendimi pozitiv nga BE për të hapur negociatat drejt anëtarësimit për Shqipërinë.
“Nxisim të gjitha palët që të respektojnë procesin e Komisionit të Venecias, përfshi kërkesën për konfidencialitet të projekt-opinionit deri sa të finalizohet. Mirëpresim vendimin e qeverisë për të mos ndërmarrë veprime të mëtejshme lidhur me legjislacionin përkatës derisa opinioni të finalizohet. Po ashtu mirëpresim deklaratën e bërë nga Presidenti Meta gjatë konferencës së tij për shtyp me Presidentin e Bullgarisë, duke afirmuar rëndësinë e një vendimi pozitiv nga BE për të hapur negociatat drejt anëtarësimit për Shqipërinë. Duhet të qëndrojmë të përqendruar tek ajo që ka më shumë rëndësi – sundimi i ligjit dhe e ardhmja e Shqipërisë në Evropë,” thekson në reagimin e saj Ambasada e SHBA në Tiranë.
Ndryshe, pas “sulmit” që Edi Rama i bëri përmes mediave në shërbim të tij Presidentit të Republikës, me publikimin e Letrës që Ilir Meta i kishte dërguar Komisionerit për Zgjerim pranë BE, në orët e mbrëmjes mediat në shërbim të Metës publikuan konkluzionet paraprake të Komisionit të Venecias ku thuhet se i jepet e drejtë Presidentit dhe shprehet se nuk ka bazë për shkarkimin e Presidentit lidhur me këtë çështje. Po ashtu Komisioni Venecia hedh hije dyshimi mbi mënyrën e veprimit të Këshillit të Emërimeve në Drejtësi.
Sipas ‘Venecias’ Meta ka vepruar në përputhje me interpretimin e arsyeshëm të Kushtetutës dhe sipas gërmës dhe logjikës së saj.
Përplasja Presidencë- KED filloi kur kjo e fundit çoi nga dy lista Presidencën dhe Parlamentit për përzgjedhjen nga dy anëtarë për Gjykatën Kushtetuese.
Kujtojmë se Presidenca zgjodhi vetëm një anëtar Besnik Muçin duke respektuar renditjen e përzgjedhjes, por Parlamenti zgjodhi dy brenda së njëjtës seancë Fiona Papajorgjin dhe Elsa Toskën. Më pas Presidenca zgjodhi edhe Marsida Xhaferllarin duke nxjerrë ‘jashtë loje’ Arta Vorpsin për të cilën mazhoranca pretendonte se duhet të ishte e emëruar automatikisht. Të dyja palët, mazhorancë Presidencë ju drejtuar për opinion Komisionit të Venecias teksa mazhoranca ndërmori një hap tjetër për ligjin e organizimit të Gjykatës Kushtetuese, ku një gjyqtar në rast se nuk thirrej për betim nga Presidenti i Republikës atëhere mund ta bënte me shkrim betimin. Ky ligj i është kthyer mbrapsht Parlamentit nga Presidenti.
