Thellohet kriza në Itali, 475 të vdekur dhe mbi 2.600 raste të reja me koronavirus

Kriza me koronavirus në Itali po thellohet. Gjatë 24 orëve të fundit 475 persona të prekur me COVID 19 kanë ndërruar jetë ndërkohë janë shënuar mbi 2.600 raste të reja me koronavirus.

Të dhënat zyrtare të bëra publike në konferencën për shtyp të orës 18:00 nga Emergjencat civile flasin për 35.713 të infektuar dhe 4.025 të shëruar.

“Për fat të keq rastet e reja me të infektuar nuk po reduktohen, përkundrazi vijonë të jenë tepër të larta. Shumë shpejt nuk do të jemi në gjendje të kurojmë të dashurit tanë,” u shpreh presidenti i rajonit të Lombardisë, Attilio Fontana që ftoi banorët të qëndrojnë në shtëpi dhe të shmangin daljet.

Ekspertët paralajmërojnë se nëse deri të dielën nuk ulen shifrat e të infektuarve nga COVID 19, qeveria duhet që të ashpërsojë masat e sigurisë për të frenuar përhapjen e këtij virusi të rrezikshëm. Ministri i sporteve, Vincenzo Spadafora, propozon që të ndalohen dhe aktivitetet fizike në ambjent të hapur, pasi nuk po respektohen distancat e sigurisë.