Unaza e Madhe, “pingpong” me tenderin e mbikëqyrjes, ARRSH shpall fituesin pas vendimit të KPP

Polemikat për mbikëqyrjen e punimeve në lotin 2 të Unazës së Madhe kanë qenë po aq të shumta sa vetë kundërshtitë dhe problematikat që shoqëruan këtë procedurë për zbatimin e projektit që ka zanafillën nga viti 2018.

Në buletinin e kësaj të marte, Agjencia e Prokurimit Publik (APP) njoftoi vendimin e Autoritetit Rrugor (ARRSH) që shpall fitues kompaninë Gjeokonsult. Historia në fakt është shumë më e ndërlikuar se kaq për një procedurë të nisur vitin e shkuar, me objekt “Supervizion Punimesh, Rehabilitim i segmentit rrugor mbikalimi Pallati me Shigjeta – rreth rrotullimi Shqiponja Loti 2” dhe që ka përfunduar në Komisionin e Prokurimit Publik (KPP) të paktën dy herë.

Gjithçka nisi në korrik të vitit 2019, kur ARRSH hapi procedurën për supervizionin ku nga katër kompani shpalli fituese kompaninë Gjeokonsult. Pas disa kundërshtimeve operatori, Instituti Konsulencës në Ndërtim IKN, paraqiti më 23 gusht në KPP ankesën e tij lidhur me këtë vendim. Komisioni i Prokurimit Publik vendosi në tetor që ARRSH të bënte rivlerësim të procedurës.

Fill pas këtij vendimi, Autoriteti Konktraktor vendosi që të shpallte fitues kompaninë IKN çka ka bërë që këtë herë në KPP të shkojë Gjeokonsult, së cilës i është hequr e drejta e të qenët fitues i kontratës.

Vendimi i KPP

Në kërkesën pranë KPP, Gjeokonsult  argumentoi ndër të tjera se oferta e shpallur fituese nga ana e ARRSH për mbikëqyrjen ishte nën nivelet minimale që parashikohen nga ligji. Teksa fondi limit i procedurës ishte 10.7 milionë lekë, kompania fituese ka ofruar gati 50% e kësaj vlere çka sipas ankimuesit dhe KPP, është një vlerë që nuk pranohet nga kuadri ligjor në fuqi.

Lidhur me këtë situatë, KPP në vendimin e datës 4 mars 2020 ka vendosur “të pranojë ankesën e paraqitur nga operatori ekonomik “Gjeokonsult” & Co” sh.p.k për procedurën e prokurimit “Shërbim Konsulence”, me Nr.REF-23485-05- 23-2019, me objekt “Supervizion Punimesh, Rehabilitim i segmentit rrugor mbikalimi pallati me shigjeta – rrethrrotullimi Shqiponja Loti 2”, me fond limit 10.700.000 lekë pa TVSH, zhvilluar më datë 12.07.2019, nga autoriteti kontraktor, Autoriteti Rrugor Shqiptar.

“Autoriteti kontraktor të anulojë vendimin e KVO-së mbi kualifikimin e operatorit ekonomik “Geosat Group” & “IKN” sh.p.k, duke e skualifikuar atë. Autoriteti kontraktor, brenda 10 ditëve, të vërë në dijeni Komisionin e Prokurimit Publik për zbatimin e vendimit, duke dokumentuar veprimet e kryera” – thuhet në vendim.

Lidhur me Projektin e Unazës së Madhe u njoftua pak javë më parë një plan i detajuar trafiku për mënyrën sesi do të kryhej lëvizja gjatë kohës së punimeve, por që këtë situatë tashmë e ka zbehur shpallja e gjendjes së fatkeqësisë natyrore për shkak të koronavirusit./Monitor/