Pas mbledhjes me strukturat e PD, Basha: Qytetarët nuk kanë marrë asnjë ndihmë nga qeveria!

Pas një mbledhje online me strukturat e Partisë Demokratike, ku u diskutua situata e rëndë që po kalon vendi në këtë kohë me COVID-19, Kryetari Lulzim Basha, konstaton se qytetarët janë në vështirësi pasi nuk kanë marrë asnjë ndihmë apo mbështetje nga qeveria.

“E përbashkëta kudo është që qytetarët janë në vështirësi për të siguruar jetesën e përditshme. Shteti ka lënë në harresë mijëra familje në nevojë dhe biznese. Shumica nuk kanë marrë akoma asnjë ndihmë apo mbështetje nga qeveria, ndërkohë që ju duhet të paguajnë edhe faturat e rritura të dritave dhe ujit,” thekson Lulzim Basha duke shtuar se Partia Demokratike do vazhdojë të jetë në kontakt me njerëzit per t’ju dhënë zë problemeve dhe halleve të tyre në këto ditë të vështira.

“Pa asnjë vonesë, qeveria duhet të shpërndajë fondet e mbijetesës dhe të përfshijë menjëherë të gjithë familjet dhe njerëzit në nevojë. Të mbështesë sipërmarrjen në vështirësi mbijetese, biznesin e vogël, fermerët, fasonët, bizneset prodhuese dhe turizimin, pa përjashtuar askënd,” shprehet Kryetari i Partisë Demokratike, Lulzim Basha, pas mbledhjes online me strukturat e partisë duke përfunduar:

“Shqiptarët që kanë paguar këto 7 vjet taksat ndër më të lartat në rajon, kanë sot nevojë për ndihmën që ju takon nga shteti. Qeveria nuk mund t’i fshihet përgjegjësisë”