Kupa e Botës, ja parashikimi për fituesin që jep Putin. Pse e përjashton Rusinë…

Presidenti i Rusisë, Vladimir Putin mendon se kandidatët kryesor për fitues të Kupës së Botës e cila do të zhvillohet në Rusi nga 14 qershori deri në më 15 korrik janë Gjermania, Brazili, Argjentina dhe Spanja.

“Kandidat për kampion ka shumë. Janë ekipet e Amerikës Latine – Argjentina dhe Brazili. Kombëtarja e Gjermanisë ka luajtur shkëlqyeshëm në kampionatet e fundit. Futboll jashtëzakonisht të bukur ka treguar edhe ekipi spanjoll,” tha Putin në një intervistë për mediat kineze, raportojnë sot mediat ruse.

Duke folur për shanset që ka kombëtarja ruse, Putin tha se kohët e fundit ajo nuk ka treguar rezultate të mëdha, por shpreson që lojtarët do të luftojnë deri në fund.

“Ne, të gjithë tifozët dhe ithtarët e futbollit rus, shpresojmë shumë që kombëtarja ruse do të tregoj një futboll të mirë dhe se do të luftoj deri në fund,” theksoi Putin.

E futbollistët më të mirë në historinë e futbollit, sipas Putin janë, Jashin, Pele dhe Maradona.

“Futbollisti më i mirë rus është Lav Jashin, e futbollisti më i mirë i huaj është Pele. Edhe Maradonën e rrespektoj shumë,” tha Putin.

Në fund Presidenti rus tha se detyra kryesore e Rusisë si shtet që organizon Kupën e Botës është që këtë garë ta shndërroj në festë për miliona adhurues të futbollit në gjithë botën.

Ndryshe, Presidenti i Rusisë, Vladimir Putin detyrimisht do të marrë pjesë në ndeshjen e parë dhe të fundit të Kupës së Botës, e nëse obligimet nuk e pengojnë, ai premtoj se do të marrë pjesë edhe në ndeshjet tjera.