Protesta/ Aleanca për Teatrin: Ndërkombëtarët të reagojnë, vendi po rrëshqet në pasiguri!
Kanë rënë institucionet, tani fjalën e keni ju, e ka sheshi. Kështu u shpreh regjisori Robert Budina në protestën e organizuar nga Aleanca për Mbrojtjen e Teatrit dhe e mbështetur nga Opozita e Bashkuar duke shtuar se nëse nuk ka një reagim të shpejtë të drejtësisë, qytetarët legjitimohen të mbrojnë veten dhe pasuritë e tyre me të gjitha format.
Sot Aleanca për Mbrojtjen e Teatrit i është drejtuar Presidentit Ilir Meta nga sheshi i protestës që të shpërndajë Parlamentin ndërsa institucioneve ndërkombëtare i bëri thirrje të reagojnë sepse vendi po rrëshqet në situatë pasigurie
Ndërkohë fjalimet e artistëve shoqëroheshin me thirrjet e ovacione “Burg për Edi Ramën”, “Poshtë diktatura”, “Rama ik” dhe “E duam Shqipërinë si gjithë Evropa”.
Drejtësi për shpirtin e pushkatuar
Aktori Neritan Liçaj duke kërkuar drejtësi për shpirtin e pushkatuar tha se Edi Rama prishi Teatrin dhe historia ka për ta dënuar.
“Ne duam një vend normal, si gjithë Europa. Unë besoj se kauzë më të mirë sesa Teatri nuk ka. Çështja jonë ka qenë patriotike, paqësore, qytetare, që të shprehemi të gjithë. Ne e kemi quajtur teatrin si sheshi i lirisë. Kjo sepse ne aty iu thoshim të vërtetat në sy njëri tjetrit. Unë do doja drejtësi për këtë krim që u bë.
Ne jemi këtu për të mbrojtur të drejtat institucionale. Duhet drejtësi për këtë shpirt të pushkatuar. Te Teatri nis bota shqiptare. Çdo gjë që ka të bëjë me mua, ka të bëjë edhe me ju, me të gjithë. Jam krenar që jam shqiptar, sepse jemi racë e fortë. Duhet parë përtej parave, përtej pushtetit,” tha Liçaj duke përfunduar:
Teatri një kauzë e drejtë dhe historia do të dënojë kryeministrin!
Nga Vermoshi deri në Konsipol: Poshtë diktatura!
Nëse kjo quhet demokraci! Ç’mund të themi për diktaturën? pyeti aktori Mehdi Malkaj mijëra mbështetës të Aelancës për Mbrojtjen e Teatrit që kishin vetëm një përgjigje: Poshtë diktatura!
“Mos ua paçim kurrë këtë borxh. Teatri ishte i vetmi në Shqipëri. Kemi dhe teatro të tjerë, siç është Durrësi. Nëse kjo quhet demokraci! Ç’mund të themi për diktaturën? Më kuptuat?”
‘Poshtë diktatura’ (dëgjohet nga turma) ndërsa Malkaj vazhdoi:
“Unë do recitoj nga 4-5 vargje. Ju do më shoqëroni me një britmë që të dëgjohen nga Vithkuqi e Vermoshi e deri në Konsipol:
Ti Shqipëri më jep nder, më jep emrin shqiptar, zemrën ma gatove, plot me dëshirë dhe zjarr.”
Teatri Kombëtar u sulmua me një akt terrorist
Regjisori Robert Budina sot ishte më i ashpër. Teatri Kombëtar, tha ai, u sulmua me një akt terrorist ndërsa i kërkoi drejtësisë të hetojë porositësin dhe ekzekutuesin e sulmit më 17 maj. Qytetarët, tha ai, kanë ngelur në mëshirë të fatit dhe forca është i vetmi mjet veprimi dhe komunikimi.
“Kryeministri tha unë i kam votat dhe bëj ç’të dua. A i ka votat. Kërkojmë nga drejtësia të hetojë sulmin terrorist, mbi aktivistët, qytetarët dhe intelektualët. kemi të gjitha pamjet se si tërhiqen zvarrë intelektualët se donin të mbronin jo teatrin por kulturën. E çuam në dëshpërim total që të kryente një akt terrorist,” tha Budina duke shtuar se motoja jonë është jo ikni por eja-eja-eja e ai që thotë ik duhet të ikë vetë.
“Ne duhet ta fitojmë betejën me të keqen dhe për këtë kemi nevojë për të gjithë.”
Mëngjesin e 17 majit, republikës sonë iu vu kazma, tha regjisori i njohur shqiptar në fjalin e tij gjatë protestës.
“Teatri Kombëtar u sulmua me një akt të mirëfilltë terrorist, me njerëz të armatosur. Goditën godinën e Teatri Kombëtar me qytetarë në godinë. Është rastësi që nuk kemi viktima nga ky akt terrorist. Pas kësaj ngjarje qytetarët vërshuan në rrugë për të ndaluar këtë masakër.”
Këtu drejtësia ka marrë fund, vlerësoi duke shtuar:
“Kontrata me shtetin është thyer, qytetarët kanë ngelur në mëshirë të fatit, forca i vetmi mjet veprimi dhe komunikimi. Kanë rënë institucionet, tani fjalën e keni ju, e ka sheshi. Nëse nuk ka një reagim të shpejtë të drejtësisë, qytetarët legjitimohen të mbrojnë veten dhe pasuritë e tyre me të gjitha format. Aleanca për Mbrojtjen e Teatrit ka depozituar dy kallëzime në SPAK ku akuzojmë direkt kryetarin dhe nënkryetarin e bashkisë për korrupsion dhe shpërdorim detyre tani dhe për vrasje në tentativë dhe nuk kemi pasur asnjë reagim nga SPAK. Të dalë para drejtësisë porositësi i sulmit dhe ekzekutuesi i sulmit më 17 maj,” tha Budina duke përfunduar:
Ju bëjmë thirrje institucioneve ndërkombëtare të reagojnë se vendi po rrëshqet në situatë pasigurie!
Nesër në orën 11:00 protesta do të zhvendoset para Prokurorisë së Posaçme për Krimin e Korrupsionin për ta nxitur të hetojë e zbardhë dhunën ndaj artistëve e aktivistëve ditën e shembjes së Teatrit.
“Nesër në orën 11: 00 jeni të ftuar para SPAK ti nxisim të fillojnë hetimet. Nga dita e pasnesërme do dalin qytet më qytet të mbledhin firmat që teatri të jetë aty ku duhet. Nëse nuk reagon prokuroria do bëjnë më dije si do veprojmë. Ne do fitojmë me paqe dhe qytetari. Se kur do të vazhdojmë në Tiranë do ua bëjmë me dije. Ju falenderojmë për këtë qytetari dhe model proteste që treguat,” tha Robert Budina në mbyllje të tubimit të sotëm duke i kërkuar të gjithë protestuesve që të firmosin peticionin.
Pas përfundimit të protestës kryetari i Partisë Demokratike, Lulzim Basha, ka firmosur peticionin e Aleancës për Mbrojtjen e e Teatrit që synon mbledhjen e 1 milion firmave për të shkuar në referendum për rindërtimin e Teatrit ndërsa e bëri të qartë se në ditët në vijim PD dhe opozita do të vijojë me hapat e mëtejshëm për një nga kërkesat e kahershme, siç janë zgjedhjet e parakohshme.
“Opozita ka një qëllim, t’u japë fund menjëherë kushteve në të cilat padrejtësia shtyp qytetarët, shkatërron pronën e tyre, i varfëron dhe kjo padrejtësi e ka një emër: ky është Edi Rama. Në funksion të këtij qëllimi ne kemi bashkuar sot gjithë forcat tona anë e mbanë Shqipërisë në një projekt ndryshimi, i cili merr jetë me votën e Shqiptarëve. Ndryshimi në Shqipëri është i paevitueshëm. Edi Rama është investuar të ndalë rrugën europiane të Shqipërisë, është investuar të ndalë përpjekjet për zgjedhje të lira e të ndershme dhe me 17 maj i ka provuar mbarë botës se me të nuk mund të ketë zgjedhje të lira dhe të ndershme, me të mund të ketë vetëm dhunim të të drejtave të qytetarëve. Ndaj kjo i jep sot betejës tonë tash trevjeçare për zgjedhje të lira e të ndershme një apel kombëtar dhe ndërkombëtar të painjorueshëm.”
Në ditët në vijim, tha Lulzim Basha, Partia Demokratike dhe opozita do të përvijojnë hapat e mëtejshëm me qëllim që synimi ynë i kahershëm për t’u dhënë shqiptarëve lirinë e votës, pa të cilën nuk mund të ketë as ekonomi, as zhvillim, as punësim dhe as Europë:
“Të realizohet një orë e më parë dhe t’u mundësojmë atyre t’i drejtohen kutive të votimit për të shporrur me një votë plebishitare dhe popullore një qeveri uzurpatore të institucioneve, një hajdut ordiner dhe një kriminel të faktuar para gjithë botës si i tillë me krimin e 17 majit, që do të përpiqemi me të gjitha forcat tona të jetë krimi i fundit i kësaj qeverie të babëzisë dhe korrupsionit.”
