Aleanca për Teatrin, sot në orën 11:00 protestë para SPAK-ut

Sot në orën 11:00 protesta e Aleancës për Mbrojtjen e Teatrit e mbështetur nga Opozita e Bashkuar do të zhvendoset para Prokurorisë së Posaçme për Krimin e Korrupsionin për ta nxitur të hetojë e zbardhë dhunën ndaj artistëve e aktivistëve ditën e shembjes së Teatrit.

“Sot në orën 11: 00 jeni të ftuar para SPAK ti nxisim të fillojnë hetimet. Nga dita e pasnesërme do dalin qytet më qytet të mbledhin firmat që teatri të jetë aty ku duhet. Nëse nuk reagon prokuroria do bëjnë më dije si do veprojmë. Ne do fitojmë me paqe dhe qytetari. Se kur do të vazhdojmë në Tiranë do ua bëjmë me dije. Ju falenderojmë për këtë qytetari dhe model proteste që treguat,” tha Robert Budina nga Aleanca për Mbrojtjen e Teatrit duke shtuar se nëse nuk ka një reagim të shpejtë të drejtësisë, qytetarët legjitimohen të mbrojnë veten dhe pasuritë e tyre me të gjitha format.

Ndërsa Kryetari i Partisë Demokratike, Lulzim Basha, tha se Opozita e Bashkuar ka një qëllim, t’u japë fund menjëherë kushteve në të cilat padrejtësia shtyp qytetarët, shkatërron pronën e tyre, i varfëron dhe kjo padrejtësi e ka një emër: ky është Edi Rama.

“Në funksion të këtij qëllimi ne kemi bashkuar sot gjithë forcat tona anë e mbanë Shqipërisë në një projekt ndryshimi, i cili merr jetë me votën e Shqiptarëve. Ndryshimi në Shqipëri është i paevitueshëm. Edi Rama është investuar të ndalë rrugën europiane të Shqipërisë, është investuar të ndalë përpjekjet për zgjedhje të lira e të ndershme dhe me 17 maj i ka provuar mbarë botës se me të nuk mund të ketë zgjedhje të lira dhe të ndershme, me të mund të ketë vetëm dhunim të të drejtave të qytetarëve. Ndaj kjo i jep sot betejës tonë tash trevjeçare për zgjedhje të lira e të ndershme një apel kombëtar dhe ndërkombëtar të painjorueshëm,” tha Lulzim Basha ndërsa e bëri të qartë se në ditët në vijim PD dhe opozita do të vijojë me hapat e mëtejshëm për një nga kërkesat e kahershme, siç janë zgjedhjet e parakohshme.