Presidenti Trump konfirmon angazhimin e forcave amerikane në Kosovë

Presidenti i SHBA, Donald Trump ka njoftuar kryetaren e Dhomës së Përfaqësuesve, Nancy Pelosi dhe presidentin e përkohshëm të Senatit, Chuck Grassley, se forcat e Shteteve të Bashkuara do ta vazhdojnë misionin e tyre në Kosovë.

Përmes një letre drejtuar Pelosit dhe Grassley, Presidenti Trump shprehet:

“Shtetet e Bashkuara vazhdojnë të kontribuojnë në forcat e KFOR-it, të udhëhequra nga NATO-ja, në bashkëpunim me autoritetet lokale, partnerët bilateralë dhe institucionet ndërkombëtare, për të penguar ripërtrirjen e armiqësve në Kosovë”.

Aktualisht, tha Presidenti Trump, në kuadër të misionit të KFOR-it janë të angazhuar 460 ushtarë amerikanë, nga 4.000 persona sa janë në total.

Në mars të këtij viti, raporton RFE, dy senatorë amerikanë, David Perdue dhe Rand Paul u shprehën se SHBA duhet të rishqyrtojë praninë e saj në Kosovë nëse Kosova nuk e shfuqizon tarifën 100 për qind ndaj mallrave të Serbisë.

Kjo masë, e zëvendësuar fillimisht me reciprocitet, është pezulluar krejtësisht nga kryeministri i Kosovës, Avdullah Hoti, për shkak të siç është shprehur ai, heqjes së të gjitha pengesave për vazhdimin e dialogut me Serbinë.

Dialogu Kosovë-Serbi është pezulluar nga nëntori i vitit 2018, kur autoritetet e Kosovës patën vendosur taksën.

Dialogu mes Kosovës dhe Serbisë, i ndërmjetësuar nga Bashkimi Evropian, ka nisur më 2011 në Bruksel.