Me investitorët e huaj, Basha: Prioriteti ynë strategjik…

Konkurenca e pandershme, korrupsioni, burokracia dhe informaliteti i lartë si shqetësimet kryesore të investitorëve të huaj në Shqipëri ishin temë e diskutimeve në takimin që Kryetari i Partisë Demokratike, Lulzim Basha zhvilloi me drejtuesit e Shoqatës së Investitorëve të Huaj në Shqipëri, Presidentin e FIAA, Constantin Von Alvensleben, Drejtoren Ekzekutive të FIAA, Marinela Jazoj dhe anëtarët e Bordit, Grant Sun, Përparim Kalo dhe Emil Georgakiev, ku dhe i siguroi se në qeverisjen e ardhshme thithja e investimeve të huaja do të jetë prioritet strategjik, krahas mbështetjes së biznesit e prodhimit vendas.

“Nuk ka prioritet më të madh për shqiptarët sot, se të kthejmë besimin të ekonomia e të nxisim punësimin si emergjencë kombëtare! Për këtë arsye, krijimi i lehtësirave dhe kushteve për të thithur sa më shumë investime të huaja, që hapin vende pune, është prioriteti ynë strategjik,” tha Lulzim Basha duke garantuar se reformat që do të ndërmarr qeveria e drejtuar nga ai do të çmontojë konkurencën e pandershme, do të eliminojë burokracitë e tepërta dhe do të luftojë korrupsionin.

“Do t’i japim fund ndryshimit të papritur dhe të pakonsultuar të rregullave, duke kthyer sigurinë juridike. Politika transparente dhe afatgjatë për taksat dhe hapja e lojës duke çmontuar monopolet dhe trajtimet preferenciale do të garantojnë konkurencë të ndershme në vend të klientelizmit korruptiv të qeverisë.”

Taksa e sheshtë 9%, heqja e taksës “Rama” mbi karburantin, eleminimi i lejeve, licencave dhe autorizimeve që pengojnë konkurencën e lirë dhe të drejtë do të jenë hapa të menjëhershëm, tha Kryetari i Partisë Demokratike, Lulzim Basha, duke shtuar se Shqipëria do të shohë përpara dhe prioritet absolut është luftimi për të mbrojtur dhe hapur çdo vend pune të mundshëm ndërsa përfundoi:

“’Shqipëria në punë nuk është thjesht një moto, por një platformë reale. Me planin tonë ekonomik do të sprapsim krizën ‘Rama’ dhe do mund të hapim vende të reja pune, të fuqizojmë ekonominë dhe të rrisim mirëqenien e shqiptarëve.”