Dita e Paqes, Osmani: S’ishte konfrontim mes dy shtetesh, por mes dy botërash!

Sot në Ditën e Paqes, Kryetarja e Parlamentit të Kosovës, Vjosa Osmani, pasi vendosi lule te Pllaka Përkujtimore e ushtarëve të KFOR-it në Sheshin “Nëna Terezë”, me Komandantin e KFOR-it, gjeneral Michele Risi, ambasadorët e shteteve të Quintit, diplomatë dhe deputetët e Kosovës, tha se në Kosovë s’kishte përballje mes dy shtetesh, por kishte konfrontim mes dy botërash.

“Vlerat tona të lirisë dhe tolerancës po përballeshin me barbarizmin. Këtu vetë ekzistenca e civilizimit tonë po mbahej në teh,”tha Vjosa Osmani duke shtuar se Kosova do të jetë gjithmonë falënderuese ndaj aleatëve që i erdhën në ndihmë në luftë ndërsa përfundoi:

“Vetëm kur i shihni gjërat në dritë të atyre vuajtjeve dhe të asaj situate të pashpresë, mund të filloni ta kuptoni se sa shumë jemi falënderues ndaj jush për ndihmën tuaj. Ajo çfarë ndodhi në Kosovë ishte një betejë për shpirtin e civilizimit tonë. Duke na ardhur në ndihmë – duke shpëtuar njerëz të pafajshëm të cilët gjendeshin në kthetrat e një regjimi barbar – ju na shpëtuat ne dhe shpëtuat civilizimin tonë.”