Me biznesin e vogël, Basha: Edi Rama, spiun i vogël që intimidon bizneset!

Sulmet e Kryeministrit Edi Rama që u bën bizneseve të cilat denoncojnë mungesën e ndihmës nga qeveria, Kryetari i Partisë Demokratike, Lulzim Basha, i cilëson si sjellje të një spiuni të vogël për t’u rënë nga mbrapa bizneseve për t’i intimiduar dhe frikësuar sepse thonë të vërtetën.

“Shikoni si e shpenzon kohën, duke gjurmuar si një hajdut i vogël, si një spiun i vogël dhe për t’u rënë nga mbrapa bizneseve, për t’i intimiduar, për t’i frikësuar, sepse thonë të vërtetën. Këto nuk janë sjelljet e një kryeministri të përgjegjshëm, këto nuk janë sjelljet e një burri shteti,”tha Lulzim Basha pas takimit me bizneset e vogla në Njësinë Administrative Nr.1 në Tiranë duke shtuar se prioritet i Edi Ramës është pasurimi i tij personal dhe i 5 oligarkëve

“Këto janë sjellje të një regjimi në ikje, të një njeriu të obsesuar pas pushtetit dhe pas pasurisë së tij personale, të një shërbëtori të mjerë të 5 oligarkëve, me të cilët punon dhe për të cilët ka vënë të punojë të gjithë Shqipërinë.”

Kryetari i Partisë Demokratike shprehu bindjen se makthi i biznesve do të marrë fund, pasi ai dhe opozita kanë vullnetin për të mos çuar paratë e buxhetit të shtetit tek 5 oligarkë.

“Shqipëria nuk do të jetë më e 5 oligarkvë, por e të gjithë shqiptarëve. Paratë e buxhetit Do të shkojnë për të mbështetur biznesin e vogël jo thjesht me një mbështetje të fuqishme, me një paketë fiskale si ajo që kemi propozuar me 0.5 % të xhiros vjetore, e vetmja taksë, asnjë taksë tjetër lokale e qendrore,” tha Kryetari i Partisë Demokratike, Lulzim Basha, duke paralajmëruar në fund dhe një moratorium 1 vjeçar:

“Mbi të gjitha, duke i çliruar nga makthi i tatimorëve, duke i futur tatimorët në garnizon, përmes një moratoriumi në vitin tonë të parë të qeverisjes dhe, pas kësaj, asnjë kontakt fizik midis inspektorëve të shtetit dhe biznesit të vogël apo biznesit në tërësi.“