Brukseli: Marrëveshja, përmes dialogut Kosovë-Serbi me ndërmjetësimin e BE

Bashkimi Evropian, BE, ka porositur Prishtinën dhe Beogradin që çdo marrëveshje, në kontekstin e dialogut për normalizimin e marrëdhënieve, duhet të kalojë përmes një procesi negociues të udhëhequr nga BE-ja.

“Bashkimi Evropian ka qenë duke e ndihmuar dialogun që nga fillimi. E ardhmja evropiane e vendeve është e mundur vetëm përmes dialogut të realizuar nga BE. Nuk ka mënyrë që kjo të anashkalohet. Gjithçka që ata merren vesh më tej, duhet të përshtatet në dialogun me BE-në,” tha zëdhënësi i Përfaqësuesit të Lartë për Politikë të Jashtme dhe Siguri pranë BE, Peter Stano.

Duke folur për njoftimin e dërguarit amerikan për dialogun, Richard Grenelln, lidhur me takimin e liderëve nga Kosova dhe Serbia më 27 qershor në Washington, zëdhënësi i Josep Borrell, tha se institucionet e Brukselit mbështesin çdo iniciativë që synon të mbështesë dhe të ndihmojë dialogun e Bashkimit Evropian.

Nuk spekuloi përmbajtjen e një marrëveshje të mundshme në Washington, por Stano, raporton RFE, nuk mendon se palët do te pajtoheshin për diçka që do të parandalonte qëllimin strategjik të popullatës, që nënkupton të ardhmen evropiane të këtyre vendeve.

Sot Kosovën e viziton Përfaqësuesi i posaçëm i BE-së për dialogun Kosovë-Serbi, Mirosllav Lajçak ku pritet të takohet me krerët institucionalë të Kosovës.

Dialogu mes Kosovës dhe Serbisë është pezulluar nga nëntori i vitit 2018, kur autoritetet e Kosovës vendosën taksën 100 për qind në mallrat e Serbisë dhe Bosnje-Hercegovinës.

Ndërkohë kjo masë është zëvendësuar me reciprocitet, mirëpo qeveria e re e kryeministrit të Kosovës, Avdullah Hoti ka hequr të gjitha masat, për shkak të siç është shprehur ai, heqjes së të gjitha pengesave për vazhdimin e dialogut me Serbinë.

Dialogu mes Kosovës dhe Serbisë, i ndërmjetësuar nga Bashkimi Evropian, ka nisur më 2011 në Bruksel.