Shifrat e larta COVID-19/ Kërcënimi, Rama: Nëse vazhdojmë kështu, do të rimbyllemi!

Pas publikimit të shifrave të fundit të përhapjes së koronavirusit, që vazhdojnë të jenë në rritje, Kryeministri Edi Rama ndonëse e pranoi se rritja e rasteve të të infektuarve ishte e pritshme ai tha se qytetarët dhe bisneset duhet të respektojnë rregullat dhe të bëjnë detyrat e tyre ndryshe do të penlizohen. Dhe, nëse do të vazhdojmë kështu, tha Baba me rikthimin në Facebok për të folur për koronavirusin, tha se do të na duhet të rimbyllemi dhe do të na duhet të përballojmë me shumëfish sëkëlldinë dhe pasojat që morëm nga mbyllja e parë

“Është e kotë të përsëris se sa herë ju kam thënë se; COVID është një armik i padukshëm. Si vë faj askujt prej jush që iu mërzit dhe u nervozua nga ajo mbyllje e madhe. Kujto që donte të shkonte në punë dhe të kthehej në normalitet. Nuk i vë fajin as atyre që me politikën e tyre; hip se të vrava, zbrit se të vrava, që dhanë shembujt skandaloz me fjalët dhe tubimet rrugëve. Kur vendosëm që të hapeshim, ishim të qartë se hapja do të sillte rrezikun e harresës. Por bëmë gjënë e duhur. Do ta ribënim sërish, sikur të ktheheshim aty ku ishim. Duke bërë protokollet e duhura. Isha dhe jam dakord me shumëkënd që kërkonte gjithnjë e më shumë ditë pas dite, kthimin në normalitet, duke thënë se shëndeti i ekonomisë familjare nuk mund të dobësohej përtej një pike të caktuar. Kemi zgjedhur me vetëdije rrugën e këshillimit, dhe jo të ndëshkimit dhe mbylljes së bizneseve që nuk respektojnë një për një protokollet e sigurisë. Kemi dashur që të jemi mirëkuptues, që të bëjmë çmos që të lehtësojmë sa të mundemi hallin që na zuri. E kemi ditur dhe kemi thënë se numrat do të rriten. Pasojat janë gjëja më normale që ndodh pas hapjes. Që po u ndodh të gjitha vendeve, ku më shumë e ku më pak.”

Kryeministri Edi Rama paralajmëroi qytetarët që të jenë të kujdesshëm dhe të zbatojnë masat, një mbyllje tjetër tha se do të ishte dërrmuese, dhe duke mos i lënë asnjë përgjegjësi vetes, ai tha se fati i kësaj lufte vendoset nga qytetarët:

“Ju kam kërkuar, ju kemi kërkuar vijimisht të mirëkuptoni nevojën për një solidaritet të ri dhe respektimin e rregullave. Secili të respektojë rregullat. Me polici e ushtarë mund të kontrollosh mbylljen, por nuk mund të disiplinosh hapjen nëse qytetarët nuk bëjnë të gjithë secili detyrën e tyre të thjeshtë.”

Dhe nëse qytetarët bëjnë detyrën dhe institucionet jo, siç po ndodhë aktualisisht në spitale dhe administratë publike nuk tha gjë, ama nuk munguan përrallat mbi armikun e padukshëm dhe luftën e popullit duke mos harruar t’i rikujtoj miletit mundësinë e rimbylljes:

“Për bukën e gojës në Shqipëri nuk ka vdekur askush qysh nga koha e Skënderbeut. Një mbyllje tjetër do të ishte dërrmuese për Shqipërinë për çdo familje dhe për burimet e energjisë së rimëkëmbjes. Ajo që dua të ndaj me ju është se nëse do të vazhdojmë kështu do të na duhet të rimbyllemi dhe do të na duhet të përballojmë me shumëfish sëkëlldinë dhe pasojat që morëm nga mbyllja e parë. As në mend nuk dua ta çoj se kjo do ndodhë sepse jemi ende në kohë.

Armiku i padukshëm nuk ka ikur asnjëherë, është aty. Numrat janë shqetësues por janë ende nën kontroll. Testimet janë rritur dhe lufta në front vazhdon njësoj me përkushtimin e mjekëve e infermierëve. Gatishmëria jonë vijon të rritet me shtimin e investimet të mjeteve. Por fati i kësaj lufte vendoset nga qytetarët. Vendoset dhe nga distancimi social në kushtet e këtij normaliteti”, deklaroi Rama.

Në fund, për të arsyetuar emrin Edi Rama iu rikthye kërcënimit. Foli për tre ndalime ndërsa paralajmëroi bizneset dhe qytetarët se nëse nuk zbatojnë masat do të penalizohen. Dhe, sa për muhabet, tha se pasi kishte folur gjerë e gjatë me ekspertët dhe ministren e shëndetësisë erdhi dhe vendimi:

1. Nuk do të lejojmë më në asnjë mënyrë asnjë lloj grumbullimi, qoftë dhe politik. Ju them të gjithëve vazhdoni punën, liria e lëvizjes është e garantuar, liria e shprehjes nuk është diskutuar ndonjëherë por grumbullime më shumë se sa numri i personave të lejuar nga protokollet e sigurisë nuk do lejohen më. Policia e Shtetit duhet dhe do bëjë detyrën pa asnjë dallim. Kush merr pjesë në grumbullime apo në grupime më të mëdha se sa numrin e lejuar do të penalizohet drejtpërdrejt individualisht.

2. Bizneset që nuk do të respektojnë protokollet nuk do tolerohen më. Përveç gjobave rrezikojnë dhe heqjen e lirisë nëse kapen duke shkelur protokollet.

3. Qytetarët do të penalizohen nëse kapen në shkelje të rregullave të thjeshta por shumë të bezdisshme të distancimit social në hapësira të përbashkëta. Kështu nuk vazhdohet më tutje”, deklaroi Rama.