Me biznesin, Basha: Ramavirusi po rëndon situatën, oligarkët Kapin Ça të Kapin!

Në Tiranë e kudo në Shqipëri situata po rëndohet çdo ditë e më shumë. Papunësia po rritet, bizneset po mbyllen e ndërsa qeveria duhet të ndërmarrë hapa të menjëhershme për t’u ardhur në ndihmë, ajo vijon me propagandën e ngopjes me lugën bosh, konstaton Kryetari i Partisë Demokratike, Lulzim Basha, pas takimit me sipërmarrësit e vegjël në zonën e Unazës së Re.

“Sot më treguan se e kanë të pamundur të shlyejnë dhe faturat, të cilat u kanë ardhur dyfish më të larta. Tarifat vendore janë rritur, çmimet janë rritur, ndërsa të ardhurat kanë rënë. Shumë prej tyre, edhe pse u ka ardhur njoftimi se kanë përfituar pagën e dëmshpërblimit për muajt e karantinës, nuk e kanë marrë atë akoma,” tha Lulzim Basha duke reaguar përmes rrjetit social Facebook pas këtyre takimeve ndërsa shtoi se në 7 vjet paratë e mbledhura nga taksat e rritura, Ramavirusi i çoi tek një grusht oligarkësh, ndërsa qytetarët në ditët e tyre më të vështira, i la në mëshirë të fatit.

“Sot, të gjithë e dinë se me Ramavirusin, situata për qytetarët vetëm do të rëndohet, ndërsa oligarkët, taksidarët dhe qeveritarët janë sulur të Kapin Ça të Kapin.”

Kjo situatë do të marrë fund me bashkimin më të madh në këto 30 vite të shqiptarëve që duan ndryshimin, tha Kryetari i Partisë Demokratike, Lulzim Basha, duke shtuar se të gjithë ata që kanë abuzuar me taksat e shqiptarëve do të japin llogari deri në një ndërsa përfundoi:

“Ne do t’u kthejmë qeverisjen qytetarëve. Ne do të bëjmë gjithçka për çlirimin dhe ringritjen e ekonomisë, për punësimin dhe mirëqenien e çdo shqiptari.”