BE pret që dialogu Kosovë-Serbi të rifillojë në korrik

Presidenti i Këshillit Evropian, Charles Michel, pas takimit me kryeministrin e Kosovës, Avdullah Hoti, tha sot se është e nevojshme të vazhdohet dialogu Kosovë-Serbi dhe pret që kjo ndodhë në muajin korrik në Bruksel.

“Gjatë takimit tonë, theksova nevojën urgjente për përparim në dialogun Beograd-Prishtinë. Emërimi i fundit i ambasadorit, Mirosllav Lajçak si Përfaqësues i Posaçëm i BE-së për dialogun Beograd-Prishtinë, ilustron fokusin e BE-së në këtë dialog, vazhdimi i të cilit është paraparë të ndodhë në muajin korrik në Bruksel,” tha Michel ndërsa Kryeministri i Kosovës, Avdullah Hoti, pasi njoftoi se nuk do të marrë pjesë në takimin e Washingtonit, ku ishte planifikuar të mbahej një takim mes delegacioneve të Prishtinës dhe Beogradit, më 27 qershor, tha në Bruksel se dialogu mes Kosovës dhe Serbisë nuk ka alternativë dhe se Kosova, sipas tij, ka një maturi të duhur institucionale për të tejkaluar çdo situatë me të cilën përballet.

Vendimi i Hotit për të mos shkuar në Washington, pason atë të presidentit të Kosovës, Hashim Thaçi, i cili menjëherë pasi Prokuroria Speciale njoftoi për paraqitjen e aktakuzave ndaj tij dhe kryetarit të Partisë Demokratike të Kosovës, Kadri Veseli, e anuloi pjesëmarrjen në takimin e 27 qershorit.

Kur u pyet se kush do të jetë bashkëbiseduesi kryesor i Brukselit pas konfirmimit se Zyra e Prokurorit Special e ngarkon presidentin e Kosovës për krime të rënda, zëdhënësi i BE-së, Peter Stano, raporton RFE, nënvizoi se Brukseli nuk zgjedh bashkëbisedues.

“Varet nga autoritetet e Kosovës që të vendosin se në çfarë mënyre interesat e tyre do të përfaqësohen më së miri. Qeveria duhet të sigurojë bashkëbiseduesit tanë.”