SHBA, Dhoma e Përfaqësuesve miraton një projektligj për reformën në polici

Dhoma e Përfaqësuesve në Shtetet e Bashkuara miratoi një projektligj për reformën në polici, por ai ka pak gjasa të bëhet ligj, për shkak të ndarjeve të thella dhe vetos së paralajmëruar nga Presidenti i SHBA, Donald Trump.

Dhoma e kontrolluar nga demokratët e votoi me 236 vota për dhe 181 ishin kundër. Projektligji është emëruar sipas George Floydit, afrikano-amerikanit që ka vdekur muajin e kaluar gjatë arrestimit nga policia. Vdekja e tij ka shkaktuar protesta kundër racizmit në gjithë botën.

Ndërsa, republikanët, raporton RFE, janë duke hartuar në Senat, ligjin e tyre për reformimin e policisë.

Floyd ka vdekur më 25 maj në qytetin Mineapolis.

Incidenti është filmuar nga kalimatarët dhe është shpërndarë në mediat sociale. Në incizime shihet se si një polic i bardhë e shtyp me gju Floydin, për gati nëntë minuta. Pak më vonë, ai vdes.

Floyd është ndaluar nën dyshimet se ka krijuar një faturë të rreme në vlerë prej 20 dollarësh.