Në Velipojë, Basha: Do të heqim taksën e Rrugës së Kombit dhe atë të karburantit!

Past takimi në Velipojë me sipërmarrës të sektorit të turizmit të zonës, Kryetari i Partisë Demokratike, Lulzim Basha, pasi konstatoi goditjen që pësoi turizmi me prishjet selektive në shërbim të një grushti oligarkësh, premtoi investime në infrastrukturë, anulimin e “taksës Rama” për Karburantin ndërsa u zotua se pushuesit nga Kosova nuk do të rëndohen më me tarifën prej 5 eurosh dhe do ta heqë taksën e Rrugës së Kombit që na ndan me vëllezërit tanë.

“Me nisjen e sezonit turistik, në vend të mbështetjes nga qeveria, ata u goditën nga fadromat dhe prishjet selektive akoma pa filluar të nxjerrin sadopak të ardhura për banorët atje. Pa asnjë dokument, banditët e pushtetit shkatërruan mundin dhe djersën e qytetarëve dhe kjo për t’u hapur rrugë projekteve korruptive të oligarkëve dhe krimit të organizuar,” tha Lulzim Basha pas takimit me sipërmarrësit e turizmit duke shtuar se politikat korruptive në shërbim të një grushti oligarkësh e kanë dëmtuar turizmin dhe ekonominë.

Pasi sipërmarrësit konfirmuan se i kishin paguar të gjitha taksat këto tre muaj, pavarësisht se janë gjendur pa punë dhe mundësi reale për t’i paguar ndërsa tregtarët u shprehën se xhiroja është përgjysmuar dhe shpresat për të nxjerrë shpenzimet e tyre për këtë vit janë fare të pakta, lideri i opozitës u shpreh se kjo situatë kërkon zgjidhje.

“Dhe që abuzimi, korrupsioni, shkatërrimi i mundit dhe djersës së shqiptarëve për afera korruptive të marrë fund, duhet të ndëshkohen përgjegjësit. Pandëshkueshmëria në këtë vend do të marrë fund,” tha Kryetari i Partisë Demokratike duke garantuar se të gjithë ata që kanë prishur pronën e ndërtuar me gjakun dhe djersën e shqiptarëve, do të marrin dënimin e merituar dhe këta banorë që kanë parë investimin e jetës të rrënuar para syve, meritojnë drejtësi.

Dhe jo vetëm kaq! Kryetari i Partisë Demokratike, Lulzim Basha, u zotua para sipërmarrësve të turizmit në Velipojë se anuloj dy taksa të rëndësishme që ndikojnë në turizmin e kësaj zone dhe jo vetëm:

“Pushuesit nga Kosova nuk do të rëndohen më me tarifën prej 5 eurosh. Ne do ta heqim taksën e Rrugës së Kombit që na ndan me vëllezërit tanë. Ne do t’i heqim bizneseve, bandat e taksidarëve nga qafa si dhe do të anulojmë “taksën Rama” për karburantin,” tha ai duke mos harruar edhe zotimin për biznesin e vogël, si sipërmarrja që përbën shtyllën kryesore të ekonomisë në vend:

“Duke caktuar vetëm një taksë 0.5% të xhiros vjetore, Qeveria jonë do të investojë në infrastrukturën rrugore, ujë dhe kanalizime dhe në rrjetin energjitik, në mënyrë që turizmi shqiptar të ketë kushte normale dhe të denja për pushuesit shqiptarë dhe të huaj.”