SPAK dhe SHÇBA ndalojnë 2 Policë Rrugor, kërkuan favore seksuale. Ja emrat…

SPAK dhe SHÇBA kanë ndalojuar 2 punonjës të Policisë Rrugore për shpërdorim detyre. Dy efektivët i mbanin peng mjetin një gruaje pas një aksidenti në shtator të vitit 2019 duke i kërkuar favore seksuale dhe para.

Prokuroria e Posaçme Kundër Korrupsionit dhe Krimit të Organizuar, SPAK, në bashkëpunim me Drejtorinë Rajonale të SHÇBA-së, Tiranë finalizuan pas disa muajsh hetime me metoda speciale, operacionin për ndalimin e 2 punonjësve të policisë në strukturën e Komisariatit të Policisë të Qarkullimit Rrugor Tiranë.

Sot u ekzekutuan urdhrat e ndalimit të Prokurorit të SPAK, në kuadër të procedimit penal për veprat penale “Korrupsion pasiv i personave që ushtrojne funksione publike” dhe “Shpërdorim i detyrës, kryer në bashkëpunim”, për punonjësit e Policisë:

– Henrik Zelija, me detyrë Oficer i Policisë Gjyqësore pranë Komisariatit Rajonal të Policisë Rrugore Tiranë;

– Laurenc Duda., me detyrë Shef Seksioni për Verifikimin e Shkeljeve Administrative.

Nga hetimet është e provuar se dy punonjësit, gjatë ushtrimit të detyrës në këmbim të dorëzimit të automjetit në pronësi të një shtetaseje të sekuestruar në cilësinë e provës materiale për një ngjarje ndodhur në shtator 2019, i kanë kërkuar përfitime të jashtëligjshme në formë ryshfeti dhe favore seksuale.

Janë siguruar prova se me veprimet dhe mosveprimet me dashje, në një periudhe kohore relativisht të gjatë, kanë zvarritur procedurat ligjore të dorëzimit të automjetit me qëllim përfitimin e favoreve të mësipërme, duke konsumuar elementë të shpërdorimit të detyrës dhe të korrupsionit pasiv. Hetimet vijojnë.

Ndryshe, SHÇBA ka ftuar qytetarët të denoncojnë çdo rast abuzimi me detyrën të punonjësve të policisë, duke telefonuar në numrin falas 0800 90 90, ndërsa garanton reagim të shpejtë dhe të ashpër ligjor.