Ah more covid, ti virus çamarrok!
nga Sara Frroku
Njeriu rron aq gjatë sa për të parë ndodhi shumë të çuditshme në jetë. Përjetojmë ngjarje të habitshme,të pashpjegueshme por besoj se një ndër 7 çuditë më të mëdha të botës moderne ka qenë me patjetër i stërfamshmi, i frikshmi virusi covid.
Më çamarrok se ky virus s’më kanë zënë sytë. Më i zgjuar se e gjithë njerëzia bashkë. Aq i zgjuar sa fshihet vetëm nëpër shkolla e qendra kursesh ku merret dija por nuk shfaqet ndonjëherë në lokale,bare,klube e restorante. Sigurisht ai di ku te fshihet. Duket që virusi e do arsimin më shume se sa ne prandaj është dhe më i zgjuar.
Virusi shfaqet dhe në mbledhje e mitingje të ndryshme por varet se kush i organizon ato mbledhje. Po qenë të lali zdromsit ikën dhe shef punën e vet por po qenë protesta kundra qeverisë ama vjen dhe ulet këmbëkryq. Ta dini ai zgjedh me mençuri kë infekton. Tradhtarët e kombit godet të parët.
Kur je duke pritur ngjitur me njerëzit për urbanin në stacion duke i shtyrë për pak vend në hije nuk të ngjitet virusi por ama në momentin që hyn brenda në urban vër maskën se atë rast pret ai.
Në shtëpi nuk të troket, je i mbrojtur aty brenda ama zonjë të lutem mbaj distancë me familjaret e tu kur je në autobus se ka prerë biletën dhe ai me ne.
Mos të harrojmë strategjinë e famshme të virusit: të bënte pushim javën dhe të shfaqej vetëm në fundjavë. Përpos kësaj ishte dhe një virus shumë gjumash: flinte gjithë ditën e zgjohej vetëm mbas orës pesë prandaj njerëz mbathjani për shtëpi se në këtë orë del për kafe ai.
Por mbi të gjitha karakteristikat e tij të habitshme qëndronte ai i diskriminuesit. Virusi urren të varfrit dhe sidomos te varfrit pa miq.
Biznesmenët,të njohur ndryshe si kriminelët, të njohur ndryshe si politikanët mund të iknin në plazh që në muajin maj pa u shqetësuar as nga virusi covid as nga ai virusi polici e shtetit. Ndërsa po të shihte një njeri të thjeshtë për qejfin e tij jashtë ambienteve të shtëpisë vraponte drejt tij menjëherë duke i bërtitur: ku shkon ti re i poshtër?
Falë Zotit policia ndërhynte menjëherë me gjobat dhe automatikisht covidi zmbrapsej nga njerëzit.
Sa i prapë dhe ky virus.
Ah more covid, ti virus çamarrok!
