E djathta fiton në Poloni, Andrzej Duda rizgjidhet president

Komisioni Kombëtar Zgjedhor i Polonisë ka konfirmuar fitoren e presidentit konservator, Andrzej Duda, me 51.21 për qind të votave në zgjedhjet presidenciale.

Rezultatet bazohen në 99,97 për qind të votave të numëruara.

Ai ishte në garë me kryebashkiakun social liberal të Varshavës, Rafal Trzaskowski, i cili ka fituar 48.79 për qind të votave.

Pjesëmarrja e votuesve ishte jashtëzakonisht e lartë me 68.12 për qind, tha Komisioni Kombëtar Zgjedhor i Polonisë.

Këto zgjedhje, raporton RFE, janë parë gjerësisht si një betejë për të ardhmen e vendit, si dhe marrëdhëniet e tendosura me Bashkimin Evropian.

Votimet u mbajtën nën rregulla të rrepta higjienike, për të parandaluar përhapjen e koronavirusit. Votuesit duhej të mbanin maska dhe doreza, distancë fizike si dhe të dezinfektonin duart. Ata përdorën lapsat e tyre për të shënuar votën.

Në raundin e parë muajin e kaluar, Duda fitoi 43.5 përqind të votave, ndërsa Trzaskowski 30.5 për qind.