Shqiptarët në Qeverinë e Serbisë, Shaip Kamberi i dorëzon Vuçiçit kërkesat

Kryetari i Partisë për Veprim Demokratik dhe kryesuesi i listës zgjedhore “Alternativa Demokratike Shqiptare – Lugina e Bashkuar”, Shaip Kamberi tha se sot përfaqësuesit e kësaj liste i dorëzuan presidentit të Serbisë, Aleksandar Vuçiç, kërkesat e tyre dhe shtoi se pasi të marrë përgjigjen do të shqyrtojnë nëse eventualisht do të bëhen pjesë e e Qeverisë së re.

“Presidentit Vuçiç i dorëzuam kërkesat tona me shkrim. Në radhë të parë duhet të bisedohet për integrimin, për problemet rreth arsimit, për zhvillimin ekonomik dhe pjesëmarrjen tonë të dukshme në ato institucione. Vetëm pasi të marrim përgjigje do të shqyrtojmë eventualisht ofertën për t’u bërë pjesë e Qeverisë së re,” tha Shaip Kamberi, pas takimit me presidentin Vuçiç, në kuadër të konsultimeve për formimin e Qeverisë së re.

Kamberi, raporton Agjencia e lajmeve FoNet, tha se kërkesat që ia dorëzuan Vuçiçit vite me radhë i kanë parashturar para qeverive të Serbisë.

“Veçmas shtrohen çështja e integrimit të shqiptarëve në institucionet e sistemit, institucionet shtetërore, problemet ekzistuese në arsim në lidhje me librat dhe mosnjohjen e diplomave nga Kosova, pastaj çështja e komunave të pazhvilluara. Kërkuam që edhe në lidhje me këtë shteti të ndërmarrë diçka,” tha Kamberi duke përmendur si shembull pozitiv fatin e punësimit kohë më parë të 11 mjekëve shqiptarë, në bazë të urdhrit të Vuçiçit, në Bujanoc e Preshevë, që dëshmon se kur ka vullnet politik problemet mund të zgjidhen ndërsa shton se kjo është hera e katërt që bisedon me presidentin e Serbisë.

“Shpresoj që këtë herë të ketë vullnet të mirë politik, vullnet të ri në Beograd që me përfaqësuesit shqiptarë të bisedohet për nivelin e zgjidhjes së problemeve jetësore që ekzistojnë ndër ne,” tha Kamberi duke u shprehur i gatshëm të bisedojë edhe me të manadatuarin e ri për kryeministër duke saktësuar se problemet shqiptare janë të qarta tash 20 vjet, që nga ai programi i famshëm për zgjidhjen e krizës në komunat Preshevë, Bujanoc dhe Medvegjë, më 2001, çështjet e shtruara atëherë dhe deri më sot nuk janë zgjidhur, tha Kamberi duke përfunduar:

“Nuk është fjala vetëm për një vend të Sekretarit të Shtetit shtetëror ose diçka tjetër, për ne është me rëndësi që të fillohet me zgjidhje të problemeve atje ku ekzistojnë, ndërsa çështja më e rëndësishme është integrimi i shqiptarëve në të gjitha institucionet shtetërore që veprojnë në komunat tona.”