Në izolim kur kthehesh nga Shqipëria, Ministrja e Jashtme kundër Hotit: Absurd, s’e votoj!

Ministrja e Punëve të Jashtme e Kosovës, Meliza Haradinaj Stublla ka dalë kundër propozimit për izolim të qytetarëve që kthehen nga Shqipëria. Haradinaj tha se propozimet për shtim të masave duke kërkuar testin negativ për hyrje nga kufiri me Shqipërinë, janë absurde.

“Është një numër i madh i qytetarëve tanë që veçse janë në Shqipëri, dhe në mungesë të testeve, është krejt absurde të vetëizolohen rreth 100,000 qytetarë, pa asnjë bazë. Logjika e izolimit total kufitar, ka sjellur vetëm dëme, sidomos për ata që kanë nevojë për trajtim shëndetësor jashtë Kosovës! Unë do të votoj kundër këtij propozimi,” tha shefja e diplomacisë kosovare duke përfunduar:

“Masat e rekomanduara nga IKSHP, duhet të respektohen maksimalisht nga qytetarët, por jo të izolohemi e të thellohet edhe më tej kriza. Higjienë, distancë dhe maskë! Kaq e thjeshtë.”

Ndryshe, një ndër masat që propozon Avdullah Hoti për të luftuar pandeminë është që qytetarët që qëndrojnë më gjatë se 48 orë në Shqipëri, gjatë kthimit duhet të prezantojnë testin negativ për COVID-19, në të kundërtën duhet të vetë-izolohen për shtatë ditë.