Vetingu, sot vendimi për Adriatik Llallën/ Çfarë pritet të ndodhë me ish-Kryeprokurorin

Adriatik Llalla, ish-Kryeprokuror i Përgjithshëm, do të mësojë sot nëse do të kalojë ose jo në sitën e Vettingut.

Kolegji i Posaçëm i Apelimit pritet që të shpallë sot vendimin, pas disa shtyrje seancash, ndërsa javën e kaluar komisioneri publik, Florian Ballhysa, deklaroi se Llalla megjithëse ka lënë detyrën në dhjetorin e vitit të kaluar, nuk është larguar si magjistrat dhe si i tillë ai duhet të kalojë në filtrat e verifikimit të pasurisë dhe figurës.

“Llalla e gëzon ende statusin e magjistratit për shkak se është ish- kryeprokuror. Ai nuk e ka dhënë dorëheqjen në formën e kërkuar”, tha Ballhysa.

Avokati i Llallës, Sokol Hazizaj, u shpreh se “parashikimet ligjore thonë se nëse subjekti jep dorëheqjen, procesi i vetingut ndërpritet. Më shumë se kaq unë nuk mund ta shpjegoj dot. Unë kërkoj lënien në fuqi të vendimit për Adriatik Llallen. Unë nuk dua ta paragjykoj vendimin tuaj, por dua që të ndiqni standardin ligjor”.

Llalla prej disa kohësh gjendet jashtë vendit. Mediat kanë raportuar si vendndodhje të tij Gjermaninë, ndërsa disa muaj më parë ai u përfshi në listën e zezë të Departamentit amerikan të Shtetit, duke u bërë i pari zyrtar i lartë shqiptarë, që publikisht nuk lejohetë të futet në SHBA.

Tashmë, ish-kryeprokurori është në pritje të vendimit nëse ai do të kalojë në sitën e Vetingut, pra nëse do të ketë një kontroll të imtësishëm të pasurisë së tij dhe lidhur me aspektin profesional. Gjithashtu Llalla po hetohet edhe nga Prokruroria e Krimeve të Rënda.