Kryesia e PD emëron Komisionin e Vlerësimit të Kandidatëve, ja emrat…
Kryesia e Partisë Demokratike sot ka vazhduar procesin e përzgjedhjes së kandidateve për deputetë me fazën e dytë duke emëruar Komisionin e Vlerësimit të Kandidatëve i cili do të seleksionoi kandidatët e dalë nga faza e parë.
Kështu sipas vendimit të Kryesisë së Partisë Demokratike, anëtarë të Komisionit të Vlerësimit të Kandidatëve, do të jenë:
1. Bujar Nishani, Kryetar i Këshillit Kombëtar të PD, ish-President i Republikës, ish-ministër dhe ish-deputet.
2. Besnik Mustafaj, themelues i PD, ish-ministër, ish-deputet, diplomat, përkthyes dhe shkrimtar i njohur.
3. Genc Ruli, themelues i PD, ish-ministër, ish-deputet, ekonomist dhe pedagog i njohur.
4. Enriketa Papa, pedagoge në Universitetin e Tiranës, historiane, shkrimtare dhe studiuese. Master në Histori dhe PhD në Histori Bashkëkohore dhe Histori të Evropës Jug-Lindore në Universitetin e Graz në Austri. Aktualisht është edhe anëtare e Bordit të Institutit për Studime të Krimeve dhe Pasojave të Komunizmit.
5. Mark Marku, analist, pedagog në Universitetin e Tiranës, në Departamentin e Gazetarisë. Master në Institutin e Marrëdhënieve Publike dhe të Komunikimit (IRCOM), Anger, Francë dhe doktoraturën në shkencat e informacionit dhe komunikimit në Universitetin Paris 2, Francë. Ish-deputet i PD.
Komisioni do të ndihmohet nga Sekretariati i përbërë nga Sekretari Organizativ, Sahit Dollapi, dhe Sekretari i Burimeve Njerëzore, Ervin Minarolli.
“Komisioni i Vlerësimit, si një strukturë e besueshme dhe me integritet, do të bëjë seleksionimin e kandidatëve të propozuar për deputetë. Modeli i konservatorëve britanikë, të cilët kanë asistuar PD, së bashku me republikanët amerikanë dhe CDU e Angela Merkel, u votua në Kuvendin Kombëtar të demokratëve në ndryshimet statutore,” thekson Kryesia e Partisë Demokratike në njoftimin e saj duke shtuar se ky proces që ndodh për herë të parë në Shqipëri, u përshëndet nga Instituti Republikan Amerikan IRI, konservatorët britanikë, CDU dhe forcat politike të PPE, që kanë inkurajuar që ky proces të ndiqet si model i demokratizimit të forcave politike, në Shqipëri dhe në gjithë Rajonin.” thuhet në njoftimin shpërndarë mediva nga zyra e shtypit në PD.
Sipas vendimit të Kryesisë së PD, Komisioni i Vlerësimit të Kandidatëve do të bëjë vlerësimin e secilit kandidat, nëse përmbush kriteret e parashikuara nga udhëzimi apo jo. Në përfundim të procesit hartohen dy lista:
1.Listën e kandidatëve që do t’i nënshtrohen procesit të konsultimit me anëtarët;
2.Listën e kandidatëve që u shtyhet aprovimi.
Kjo fazë është parashikuar të përmbyllet më 15 shtator për të vazhduar me fazën e tretë, atë të Konsultimit të listës se kandidatëve potencialë nga anëtarësia.
Ndryshe, në fazën e parë të propozimeve, në një proces që zgjati 6 javë, Kryesia e PD thekson se janë identifikuar një numër i madh kandidatësh në të 12 qarqet, ku bien në sy se, krahas emrave të njohur të strukturave të partisë, ka shumë emra jashtë strukturave të saj, kryesisht nga bota akademike dhe shoqëria civile.
