Kosovë-Serbi, O’Brien dhe Grenell kryesojnë takimin në Shtëpinë e Bardhë
Organizatorë të takimit të 2 Shtatorit në Shtëpinë e Bardhë, ku do të takohen liderët e Kosovës dhe Serbisë, do të jenë Këshilltari për Siguri Kombëtare, Robert O’Brien dhe I Dërguari i Posaçëm i Presidentit amerikan për dialogun Kosovë-Serbi, Richard Grenell.
Kështu bëri të ditur për RFE një zyrtar i lartë i administratës amerikane pasi Ambasadori Grenell publikoi lajmin mbi takimin e 2 Shtatorit:
“Shtetet e Bashkuara mezi presin këto diskutime të rëndësishme ndërmjet kryeministrit Hoti dhe presidentit Vuçiq. SHBA-ja beson se përparimi në çështjet ekonomike është kyç në avancimin e procesit të paqes,” tha Zyrtari i lartë i administratës amerikae për REL pasi Kryeministri i Kosovës, Avdullah Hoti dhe Presidenti i Serbisë, Aleksandar Vuçiç konfirmuan se i janë përgjigjur pozitivisht ftesës së Richard Grenell për takim në Shtëpi të Bardhë më 2 shtator.
Të dy liderët u shprehën se në këtë takim do të bisedohet për çështje ekonomike.
Ndryshe, ky është takimi i dytë i thirrur nga I Dërguari i Posaçëm i Presidentit amerikan për dialogun Kosovë-Serbi, Richard Grenell. I pari, i planifikuar për 27 qershor, ishte anuluar pak ditë para mbajtjes, meqë Zyra e Prokurorit të Specializuar me seli në Hagë kishte deklaruar se ka paraqitur një aktakuzë për krime lufte ndaj presidentit të Kosovës, Hashim Thaçi, i cili ishte i ftuar në takimin e Washingtonit.
Megjithatë, dialogu mes këtyre dy shteteve ka rinisur më 16 korrik në Bruksel. Ky proces, që ndërmjetësohet nga pala evropiane, ka nisur më 2011. Ai ishte bllokuar nga nëntori i vitit 2018, pasi autoritetet e Kosovës patën vënë taksë në mallrat serbe.
