Konfirmohen parimet e koalicionit, LSDM-BDI: Jemi drejt marrëveshjes!

Negociatat për formim të Qeverisë së re të Maqedonisë së Veriut mes LSDM-së dhe BDI-së vazhdojnë në nivele të ndryshme. Përmes komunikatës së përbashkët, LSDM dhe BDI konfirmojnë se tashmë i kanë përcaktuar parimet mbi të cilat do të bazohet qeveria e re dhe se po përgatiten për hapat e radhës siç janë: përpunimi i programit të detajuar për punë dhe definimi i propozimeve për kuadro të përshtatshme, të përgatitura, të ndershme dhe të afta.

Dy partitë shprehen të bindura se kjo qasje do të shpie në marrëveshje përfundimtare për Qeveri me mandat të plotë katër-vjeçar, e cila do të votohet në Parlament, raporton Alsat, dhe si e tillë do t’iu shërbejë të gjithë qytetarëve njësoj dhe do ta vazhdojë partneritetin me aleatët euro-atlantik. Dy palët negociuese nuk zbulojnë nëse i kanë tejkaluar dallimet rreth të parit të ekzekutivit, ndërsa negociatat do të vazhdojnë edhe gjatë fundjavës.  

Ndërkohë koalicioni ASH-Alternativa mbetet në qëndrimin se do ta mbështesin një Qeveri mes LSDM-së dhe BDI-së vetëm në rast se e bëjnë kryeministrin shqiptar, në të kundërt do të shfrytëzojnë të gjitha mekanizmat demokratik për ta çuar BDI-në në opozitë.

“Nëse BDI nuk arrin ta realizojë këtë zotim për të cilin e ka legjitimitetin, ajo parti nuk ka të drejtë ndryshe të marrë pjesë në qeveri. Prandaj vendi i saj do të mbetet në opozitë,” tha Skender Rexhepi nga koalicioni ASH- AAA.

Nga koalicioni mohojnë të kenë pasur takime me kandidatin e mandatuar për kryeministër, Zoran Zaev, për pjesëmarrje në ekzekutivin e ardhshëm, por shprehen të gatshëm të negocionin me të nëse nuk arrihet marrëveshje me BDI-në.

Ndryshe, dje Zoran Zaev mori mandatin nga Presidenti, Stevo Pendarovski. Tani ka afat prej 20 ditësh për krijimin e shumicës parlamentare dhe Qeverisë, në të kundërtën, mandati do të bartet te VMRO-DPMNE, si partia e dytë me më shumë mandate deputetësh në Parlament.