Qeveria e Gjermanisë: Alexei Navalny u helmua me…

Qeveria gjermane sot ka bërë të ditur se testet e kryera nga mostrat e marra prej liderit opozitar rus, Aleksei Navalny, kanë treguar prezencë të agjentit nervor, Noviçok.

Zëdhënësi i kancelares gjermane, Steffen Seibert, tha sot se testimet e kryera në spitalin ushtarak gjerman kanë treguar shenja “të një agjenti nervor nga grupi Noviçok”.

Navalny, politikan dhe investigues i korrupsionit, njëherësh një prej kritikëve më të mëdhenj të presidentit rus, Vladimir Putin, është sëmurë më 20 gusht gjatë një udhëtimi me avion, derisa ka qenë duke udhëtuar nga Siberia në Moskë. Aeroplani është detyruar të bëjë ulje emergjente, në mënyrë që Navalny të dërgohet në spital.

Pas spitalit siberian, ai më vonë është transferuar në një spital në Berlin, ku mjekët javën e kaluar kanë thënë se ka mundësi që Navalny është helmuar.

Ekipi i Navalnyt dyshon se ai është helmuar përmes një çaji që ka pirë në aeroport, përpara se të nisej drejt Moskës.