Hoti kërkon të raportoj në Parlament, AAK e kërcënon me shkarkim

Kryeministri i Kosovës, Avdullah Hoti, ka kërkuar t’i mundësohet që, në njërën nga seancat e ardhshme, të raportojë në Parlamentin e Kosovës për Marrëveshjen e normalizimit të marrëdhënieve ekonomike në mes të Kosovës dhe Serbisë, të nënshkruar në Shtëpinë e Bardhë. Ndërkohë Aleanca për Ardhmërinë e Kosovës porositi kryeministrin Avdullah Hoti se mund të shkarkohet qysh nesër nëse nuk merret parasyshë AAK si partner qeverisës.

“Më 4 shtator 2020, në Uashington, në Shtëpinë e Bardhë, është arritur një Marrëveshje e rëndësishme për vendin tonë lidhur me normalizimin e marrëdhënieve ekonomike në mes të Kosovës dhe Serbisë. Ky është hap shumë i rëndësishëm drejt marrëveshjes përfundimtare për normalizim të plotë të marrëdhënieve dhe njohje reciproke në mes të dy shteteve,” thotë Hoti duke shtuar:

“Në bazë të kompetencave dhe përgjegjësive të mia kushtetuese e ligjore, jam i gatshëm që në njërën nga seancat e radhës të Kuvendit të Republikës së Kosovës të raportoj para deputetëve për marrëveshjen në fjalë, si dhe për procesin e dialogut në përgjithësi.”

Ndërkohë zyrtarët e Aleancës për Ardhmërinë e Kosovës po diksutojnë me liderin e partisë, Ramush Haradinaj lidhur me qëndrimin në koalicionin qeverisës ndërsa deputeti i AAK, Gazmend Syla tha se Hoti mund të shkarkohet qysh nesër.

“Mendoj që ishte dashtë me qenë tema e takimit në Washington, nënshkrimi i marrëveshjes. Do të diskutojmë për koalicionin, i shohim këto fërkime ne, por zoti Hoti duhet të ketë parasyshë se ai ka ardhur me votën tonë kryeministër dhe mund të shkarkohet nesër, siç janë shkarkuar edhe kryeministrat tjerë,” tha Syla duke kërkuar transparencë nga Hoti:

“Ai duhet të e respektoj partnerin e koalicionit në këtë rast Aleancën, edhe raportimin në Kuvend duhet ta bëjë, është obligim i kryeministrit me na tregu. Besoj që do e bëjë edhe vet pa pasur nevojë ne me mbledhur nënshkrime me e ftu me raportu, tash po e presim edhe reagimin e tij.”