Kthehet në identitet/ I drejtohet Bashës, Meta: Thuaj popullit që jam peng…

Ilir Meta nuk është vetëm ai Presidenti i Republikës që dekoron komunistët për krimet që kanë kryer ndaj popullit shqiptar, por është shumë më i zi se aq! Doli për të folur për gjobat që ka vënë qeveria për ata që nuk i binden vendosjes së maskave me detyrim, u mor me integrimin, vizitën e shefit të diplomacisë greke dhe ndonëse deri më sot nuk iu bind njeri, madje as kryetarja e LSI, ai sot tha se nëse nuk reflektohet për ndryshimet në Kodin Zgjedhor atëhere Shqipëria do të shkojë në referendum në datën 25 prill! Në fund foli dhe për atë që kishte dalë sot, për të kërcënuar liderin e Opozitës së Bashkuar!

“Masat e marra nga ekspertët janë të mirëpritura, por akti që gjobit qytetarët për mosmbajtje maskash është një maskaradë, shkel në mënyrë flagrante liritë e qytetarëve, i kërcënon se mund t’i lërë pa dritra deri në fund të dimrit, e shndërron OSHSE në instrument policor dhe elektoral, nuk është zgjidhje t’i lësh njerëzit pa drita, e kur të mos paguajnë dot fatura t’ju presësh dritat? OSHEE ka funksion të furnizojë me energji në mënyrë të pandërprerë, jo të presë dritat në rast se qytetarët nuk paguajnë gjobat. Akti ka qëllim dashakeqës, do të bëjë me precedentë penalë shqiptarët e të përfundojnë në dyert e prokurorisë dhe gjykatave. Qeveria të reflektojë, Kuvendi po ashtu ta ndryshojnë atë,” tha Ilir Meta ndërsa ka një synim të veçantë më 25 Prill:.

”Duhet të reflektojmë të gjithë dhe mos e kthejmë 25 prillin në referendum. Ose do e kthej në referendum, më i madhi që nga koha e Skënderbeut. Këtë gjë nuk e ndal dot më askush. Të gjithë të bëhen pjesë dhe askush mos dalë kundër ose do ketë kundër gjithë popullin shqiptar, të majtë e të djathtë.

Presidenti do bëjë çdo gjë që të respektohet 5 qershori. Ata do vendosin që ta çojnë në referendum? Patjetër. Me gjithë demokratët, socialistët, ballistët, pa parti, që do i qëndrojmë amanetit të Skënderbeut. Sic ka thënë Fan Noli, do jetë më i gjalli ndër të gjallët. Presidenti ka plane pa fund, për të garantuar që Shqipëria mos bjerë në një humnerë ta shtyjnë forcat antishqiptare. Kthimi do jetë shumë i mirë argumentuar nga ana kushtetuese, standardet e Venecias, OSBE , KiE, sepse do ketë kthim të argumentuar, dhe një kthim që do ndiqet nga partnerët ndërkombëtarë.”

Në fund, duke folur me gjuhën që i drejtohet kryetarit të LSI Skrapar ose dhe Haxhinastos, sot Ilir Meta duke komentuar përgjigjen e Lulzim Bashës dhënë gazetarëve ditë më parë shprehet:

“Mbrojtja e Kushtetutës nuk është territor i askujt, është detyrë e parë e presidentit të Republikës. Në këtë drejtim presidenti nuk është vetëm qytetari i parë i Republikës, por dhe kreu i Forcave të Armatosura, është ushtari i parë i i Republikës. Këtë duhet ta dijë kushdo. Ka ardhur koha për të verifikuar ndershmërinë e çdo politikani, por mund të vijë dhe për çdo qytetar. Ta dinë të gjithë dhe Armiqtë e Shqipërisë do i marrin përgjigjen shumë shpejt, atje ku nuk i shkon mendja. Boll i futën duart e zeza këtu, për të na bërë një vend gaz i botës,” tha Ilir Meta duke u kthyer në identitet, ai i viteve të egëra 2001/2002 kur nuk kishte armik tjetër përveç se demokratët, që i tërhiqte zvarrë e për leksion terrori u arrestoi dhe liderin, kur i rrihte gazetarët e ca prej tyre nuk i kapi plumbi, sot për liderin e tyre aktual ka këtë përgjigje:

“Atij zotërisë i them; përpiqu të bësh aq sa bëri Alija Izetbegović kur e morën peng. Thuaj popullit tënd që; “jam peng” e vazhdo punën tende. Këtë popull nuk e merr më askush peng, në këtë qiell e në këtë tokë.”

Ndryshe, për këtë fat të zi shqiptar që kohë më parë ishte Kryeministër dhe sot është President, Kryetari i Partisë Demokratike, Lulzim Basha, u pyet nëse Meta po sillej si lideri i opozitës, Basha me mirësjelljen që për Presidentin e Republikës është e panjohur, u përgjigj:

“Vetëm nëse mendoni se unë kam marrë përsipër rolin e Presidentit të Republikës. Ai është në rolin e tij.”