Më 29 nëntor, zgjedhjet në Podujevë dhe Mitrovicë Veri

Presidenti i Kosovës, Hashim Thaçi ka shpallur zgjedhjet e jashtëzakonshme për kryetar të Komunës së Podujevës dhe Mitrovicës Veri, të cilat janë caktuar që të mbahen më 29 nëntor.

Sipas Presidencës, zgjedhjet në këto dy komuna do të mbahen në koordinim dhe bashkërendim me institucionet përkatëse, në pajtim me Ligjin për parandalimin dhe luftimin e pandemisë.

Presidenti Thaçi më herët kishte shtyrë mbajtjen e zgjedhjeve të jashtëzakonshme në këto dy komuna, për siç ishte thënë, parandalimit të përhapjes së koronavirusit.

Komuna e Podujevës ka mbetur pa kryetar qysh në fillim të shkurtit, kur Agim Veliu ka dhënë dorëheqje, pasi është emëruar ministër i Brendshëm në Qeverinë e Albin Kurtit.

Pa kryetar, raporton RFE, nga fillimi i qershorit, ka mbetur edhe komuna Mitrovicë Veri, pasi Goran Rakiç nga Lista Srpska, është emëruar Zv/kryeministër dhe ministër i Pushtetit Lokal në Qeverinë e re të Avdullah Hotit.