Nëse miratohet sot Kodi i ri Zgjedhor, Basha: Hapi i radhës…

Nëse mazhoranca miraton sot në Parlament ndryshimet në Kodin Zgjedhor, Kryetari i Partisë Demokratike, Lulzim Basha, e bëri të qartë se hapi i radhës janë zgjedhjet e 25 prillit, ku opozita do të bëjë gjithçka për ta larguar një njeriun që shkel mbi jetën e shqiptarëve dhe mbi të ardhmen tonë evropiane, Edi Rama.

“Problemi është se në krye të Shqipërisë sot është një armik i shqiptarëve. Ai po sakrifikon të ardhmen evropiane të shqiptarëve. Hapi i parë janë zgjedhjet e 25 prillit. Do bëjmë gjithçka për ta larguar një njeri që shkel mbi jetën e shqiptarëve, por edhe mbi të ardhmen tonë evropiane. Është një armik i dëshmuar i integrimit të Shqipërisë,” tha Lulzim Basha duke shtuar se kur po fusnim vendin në NATO, Edi Rama bënte demonstrata, kur ishim gati të merrnim statusin kandidat, ai bllokoi tre ligjet, tani, nëse i shkon marrëzisë deri në fund, po bllokon konferencën e parë ndërkombëtare, për shkak të makthit që e ka kapluar.

Me këtë rast, Kryetari i Partisë Demokratike, Lulzim Basha u zotua se Edi Ramën e pret humbja më e thellë e ndëshkimi më shembullor ndërsa përfundoi:

“Do t’i fund pandëshkueshmërisë. Do të japë përgjegjësi për gjithçka ka kryer. Nuk ka formulë që shpëton Edi Ramën nga ndëshkimi popullor. Akti i vetëm i përgjegjshëm do të kishte qenë të zhvillonte zgjedhje normale, por sido që të jetë hakun do ta marrë. Nuk ka për t’i ikur hakut të shqiptarëve.”