BSH: Ekonomia ra më pak se parashikimet. Në rast të një mbylljeje të dytë…
Banka e Shqipërisë, BSH, vlerëson se deri tani, ndikimi negativ i pandemisë në ekonominë shqiptare ka qenë më i ulët se parashikimet.
Gjatë prezantimit të raportit të politikës monetare për tremujorin IV të vitit, ekspertët e Bankës së Shqipërisë u shprehën se, mbështetur në të dhënat e deritanishme, ekonomia shqiptare do të tkurret më pak nga sa parashikohej.
Në parashikimin e mëparshëm, Banka e Shqipërisë priste që Prodhimi i Brendshëm Bruto të ulej me 7.6% për vitin 2020. Ndonëse ekspertët e Bankës Qendrore nuk publikuan parashikime pikësore, pritshmëritë tani janë për një rënie disi më të ulët se niveli i mësipërm. Duket se ekonomia ka reaguar më mirë se mendohej pas hapjes, falë stimujve paralelë monetare dhe fiskalë, por, edhe falë soliditetit të sektorit bankar, që ka vijuar kreditimin.
Projeksionet e Bankës së Shqipërisë ngelen disi më optimiste se ato të institucioneve të specializuara ndërkombëtare. Në parashikimin e fundit, Banka Botërore priste rënie të ekonomisë shqiptare me 8.4% për vitin 2020.
Megjithëse Shqipëria po përballet me një keqësim të dukshëm të gjendjes epidemiologjike, Banka e Shqipërisë ende i qëndron skenarit bazë të një kthimi të rritjes ekonomike për vitin 2021. Ekspertët e departamentit të politikës monetare u shprehën se masat e deritanishme nuk do të kenë një ndikim të krahasueshëm me mbylljen totale të ekonomisë, që u vendos në periudhën mars-maj 2020. Sipas tyre, vetëm një vendim ri për mbyllje totale mund të sjellë pasoja që do të diktonin një rishikim thelbësor të parashikimeve aktuale.
Banka e Shqipërisë ka lënë të kuptohet që në rast të një mbyllje të gjerë të ekonomisë, do të reagojë duke shtuar stimulin monetar. Veç uljes së mëtejshme të normës bazë, planet e kontigjencës së Bankës së Shqipërisë përmbajnë edhe adoptimin e masave jokonvencionale, në formën e programeve të lehtësimit sasior me blerje të titujve të qeverisë në tregun dytësor. Norma bazë e interesit aktualisht qëndron në nivelin më të ulët historik, prej 0.5%.
Në çdo rast, Banka e Shqipërisë ka orientuar tregjet dhe publikun se do të vazhdojë politikën monetare stimuluese edhe në horizontin e parashikimit, që nënkupton afërsisht një periudhë 3-vjeçare.
Në fillim të muajit nëntor, zëvendësguvernatorja, Luljeta Minxhozi, tha pas mbledhjes së Këshillit Mbikëqyrës se normalizimi i politikës monetare, i kuptuar si rritje e normave të interesit, do të nisë vetëm kur të ketë tregues të fortë dhe bindës të rimëkëmbjes së ekonomisë nga kriza. Skenarët e pritshëm të shëndetit të ekonomisë, që do të kushtëzojnë edhe kursin e politikës monetare, ngelen të varur kryesisht nga pandemia dhe sidomos nga masat e reja kufizuese./Monitor/
