Gjobitë popullin dhe i kërkon ndihmë, Komiteti Teknik i Ekspertëve: Qytetarët duhet…
Komiteti Teknik i Ekspertëve vendosi masat për parandalimin e përhapjes së koronavirusit dhe për shkelsit e këtyre masave nuk ofroi informacion, sensibilizim ose paralajmërim por policë arrogantë që vendosin gjoba.
Sot kur gjobat dhe arroganca policore nuk ka dhënë efekt ndërsa qytetarët janë terrorizuar deri në vendet më të humbur të Shqipërisë, e koronavirusi vazhdon përhapjen, ky Komiteti i Gjobave që veten e quan Komitet Teknik i Ekspertëve thotë se qytetarët duhet të rrisin bashkëpunimin me institucionet shëndetësore, për të bërë të mundur luftimin e COVID-19.
Në një dalje publike, kryetarja e Komitetit, Mira Rakacolli tha se beteja me COVID-in nuk është thjesht betejë spitalore duke kërkuar nga të gjithë zbatimin e masave.
“Është betejë territori dhe është betejë e të gjithëve. Vetëm nëse do të zbatojmë të gjithë ato masa që ne me shumë forcë i kemi thënë vazhdimisht, kemi kërkuar me shumë këmbëngulje zbatimi ne tyre, vetëm në këtë mënyrë do ta ndalojmë epideminë. Në vendimet që marrim, jemi të orientuar nga numrat dhe nga rekomandimet e OBSH, kolegët tanë në rajon e Europë. Të vazhdojmë të mbajmë maskat, të respektojmë ato që i shtuam javën e fundit. Të mos shkojmë në lokale, të mos grumbullohemi më shumë se 10 veta, të evitojmë pjesëmarrjen në ceremonitë familjare,” tha Rakacolli ndërsa sqaroi nëse do të ketë ose jo mbyllje të përkohshme të sistemit parauniversitar:
“Ashtu sikurse ne e kemi vënë në dije gjatë këtyre dy muajve nuk ka ndonjë ndryshim të rëndësishëm në influencën që ka pasur hapja e shkollave në rëndim të pandemisë.
Mirëqenia në përgjithësi e fëmijëve është dhe orientimi që jepet së fundmi nga OBSH. Në shifrat që jemi tani, në një nivel të qëndrueshëm nuk e diskutojmë për momentin sot por e ndjekim në 24 orë,” tha Rakacolli duke përfunduar:
“Nëse shifrat do të ndryshojnë dhe do të jenë brenda numrave që kërkojnë masë të tillë, po. Ajo që ne kemi parasysh është mirëqenia e fëmijëve në përgjithësi.”
Ndërsa njëra nga ekspertet e gjobave, Drejtorja e Institutit të Shëndetit Publik, Albana Fico, tha se situata paraqitet në nivel risku të shtuar.
“Po shikojmë me vëmendje ecurinë e pandemisë në vend. Situata paraqitet në nivel risku të shtuar, sepse është rritur incidenca 14 ditore. Femrat janë prekur 52 për qind dhe meshkujt 48 për qind. Grup-moshat më të prekura janë ata më të moshuara.
Kjo situatë kërkon bashkëpunim mes institucioneve shëndetësore dhe qytetarëve, me masa si distanca, maska, respektim të masave të vendosura kohët e fundit,” tha Dr.Fico.
Ndërkaq kreu i Urgjencës Kombëtare Skënder Brataj tha se numri i thirrjeve drejt 127 është i njëjtë, por se numri i vizitave vijon të jetë i lartë.
“Vazhdon njësoj numri i thirrjeve. Nuk ka rritje, është stacionare, madje rreth 200 thirrje më pak. Numri i vizitave i lartë, 463 në 24 orët e fundit. Vazhdojmë të kryejmë të njëjtat funksione 46% e pacientëve përfundojnë në spital. Janë marrë masat për një menaxhim më të mirë të shtretërve në 3 spitalet njëkohësisht.”
